احمد آباد: ایئر انڈیا کی لندن جانے والی پرواز کے دل دہلا دینے والے حادثے پر عالمی سطح پر غم و افسوس کی لہر دوڑ گئی۔ بھارت کے وزیراعظم نریندر مودی اور برطانیہ کے وزیراعظم کیئر اسٹارمر نے حادثے پر شدید دکھ کا اظہار کیا ہے۔
نریندر مودی نے سوشل میڈیا پلیٹ فارم ایکس (X) پر اپنے پیغام میں لکھا: "احمد آباد کا یہ سانحہ ناقابلِ بیان صدمہ ہے۔ ہر دل کو دہلا دینے والا لمحہ ہے۔ میری دلی ہمدردیاں متاثرہ خاندانوں کے ساتھ ہیں۔ تمام متعلقہ ادارے اور ٹیمیں امدادی کارروائیوں میں مصروف عمل ہیں تاکہ ہر ممکن مدد فراہم کی جا سکے۔”
برطانوی وزیراعظم کیئر اسٹارمر نے بھی ایک بیان میں واقعے کو "افسوسناک اور دلخراش” قرار دیا۔ انہوں نے کہا کہ لندن جانے والی پرواز میں کئی برطانوی شہری بھی سوار تھے اور ان کی حکومت تمام معلومات پر مسلسل نظر رکھے ہوئے ہے۔
یاد رہے کہ جمعرات کی صبح ایئر انڈیا کی پرواز AI-171 احمد آباد سے لندن کے لیے روانہ ہوئی، مگر ٹیک آف کے فوراً بعد فنی خرابی کے باعث گر کر تباہ ہوگئی۔ طیارے میں 242 افراد سوار تھے، جن کی جانوں کے بارے میں تاحال کوئی حتمی معلومات نہیں دی گئیں۔
