لاہور (نمائندہ خصوصی) نگران پنجاب حکومت نے 9 مئی کے واقعات میں ہائی پر وفائل کیسز میں ضمانت پر رہا افراد سے متعلق اہم فیصلہ کر لیا، متعلقہ افراد کی ضمانتیں منسوخ کرانے کے لئے اپیلیں دائر کی جائیں گی۔
نگراں وزیراعلی محسن نقوی کی زیر صدارت اجلاس ہوا جس میں 9 مئی واقعات میں ملوث افراد کے خلاف کارروائیوں میں پیشرفت کا جائزہ لیا گیا اور ملزمان کی ضمانتیں منسوخ کرانے کے لئے اپیل دائر کرنے کا فیصلہ کیا گیا۔محسن نقوی نے سانحہ 9مئی میں ملوث 171 افراد کی شناخت نہ ہونے کا نوٹس لیتے ہوئے شناخت کا عمل جلد از جلد مکمل کرنے اور مفرور مرکزی شرپسندوں کو جلد قانون کی گرفت میں لانے کا حکم دیا۔
اجلاس سے خطاب کرتے ہوئے محسن نقوی کا کہنا تھا کہ کیسز کو پیشہ وارانہ طریقے سے آگے بڑھایا جائے، مفرور شرپسندوں کا تعاقب جاری رکھا جائے۔
٭٭٭٭٭
