لاہو ر(سپورٹس ڈیسک) افغانستان کے خلاف ٹی ٹونٹی ڈیبیو کرنے والے نوجوان بیٹر صائم ایوب نے کہا ہے کہ سابق اوپنر سعید انور کی بیٹنگ سے متاثر ہوں اور لیجنڈری بلے باز کی طرح آئیڈیل بننا چاہتا ہوں۔
نیوزی لینڈ کے خلاف ہوم سیریز کے آغاز سے قبل پریکٹس سیشن کے بعد میڈیا سے گفتگو کرتے ہوئے نوجوان بلے باز صائم ایوب نے کہا کہ پاکستان سپر لیگ (پی ایس ایل)میں پشاور زلمی کے لیے کھیلتے ہوئے کپتان بابراعظم کے ساتھ کھیلتے ہوئے بہت کچھ سیکھا، انکے ساتھ کھیل کر لطف اٹھایا۔صائم ایوب نے کہا کہ بابراعظم نے پی ایس ایل میچز کے دوران اوپنگ کرتے ہوئے مجھے اعتماد دیا، میری کوشش ہوگی اپنی دوسری انٹرنیشنل سیریز میں بھی پرفارم کروں۔
نوجوان کرکٹر نے سعید انور کے حوالے سے کیے گئے سوال پر کہا کہ سابق اوپنر کی بیٹنگ سے متاثر ہوں اور لیجنڈری بلے باز کی طرح آئیڈیل بننا چاہتا ہوں۔پاکستان سپر لیگ (پی ایس ایل)کے آٹھویں ایڈیشن میں صائم ایوب نے 12میچوں 341رنز بنائے جس میں 165.53کے اسٹرئیک ریٹ سے بلے بازی کا مظاہرہ کیا تھا جبکہ 5 نصف سینچریاں بھی شامل تھیں۔
افغانستان کے خلاف سیریز میں بائیں ہاتھ کے بلیباز خاطر خواہ کارکرگی دکھانے میں ناکام رہے تھے انہوں نے تین میچز میں محض 66 رنز بنائے تھے جبکہ انکا ٹاپ اسکور 49 رنز تھا۔
