واشنگٹن(انٹرنیشنل نیوز )سائنس اور ٹیکنالوجی کی دنیا میں حیرت انگیز ترقی جاری ہے، اور اب سائنسدانوں نے ایک ایسا روبوٹ تیار کر لیا ہے جو مائع سے ٹھوس میں تبدیل ہو سکتا ہے، بالکل اسی طرح جیسے 1991 کی مشہور ہالی وڈ فلم ٹرمینیٹر2, ججمنٹ ڈے میں دکھایا گیا تھا۔
اس فلم میں خوفناک T-1000 روبوٹ، جو دھات سے مائع میں بدل کر رکاوٹوں کو عبور کر لیتا تھا، محض ایک تخیلاتی تصور تھا، مگر اب یہ حقیقت میں ممکن ہو چکا ہے۔ امریکی یونیورسٹی آف کیلیفورنیا، سانتا باربرا کے محققین نے ایک ایسا روبوٹ بنایا ہے جو مختلف اشکال میں تبدیل ہونے کی صلاحیت رکھتا ہے۔ یہ خودکار چھوٹے روبوٹس دراصل چھوٹے ہاکی پک جیسے ڈسک کی شکل میں ہوتے ہیں، جو مختلف حالات کے مطابق اپنی سختی اور لچک کو تبدیل کر سکتے ہیں۔
یہ حیرت انگیز روبوٹس مقناطیس، موٹرز اور روشنی کی مدد سے اپنی ساخت کو بدل سکتے ہیں، خود کو دوبارہ جوڑ سکتے ہیں اور یہاں تک کہ خود کو ٹھیک بھی کر سکتے ہیں۔ محققین نے اس حیرت انگیز ایجاد کے لیے قدرت سے تحریک حاصل کی۔ جیسا کہ انسانی جنین اپنی ابتدائی مراحل میں ایک نرم ساخت سے سخت اعضا جیسے کہ ہڈیوں اور دماغ میں ڈھل جاتا ہے، اسی اصول پر یہ روبوٹ کام کرتے ہیں۔ جرمنی کی ڈریسڈن یونیورسٹی آف ٹیکنالوجی میں فزکس آف لائف ڈپارٹمنٹ کے ڈائریکٹر، اوٹگر کمپاس کے مطابق، زندہ اجسام کے خلیے اپنے ارد گرد ترتیب بدل کر سخت اور نرم اشکال میں ڈھل سکتے ہیں، جو کہ ایک قدرتی عمل ہے۔
ہم نے اسی مظہر کو روبوٹکس میں لاگو کرنے کی کوشش کی ہے۔ یہ روبوٹ نہ صرف اپنی شکل بدل سکتے ہیں بلکہ بھاری اشیا کو سہارا دے سکتے ہیں، انہیں اٹھا سکتے ہیں، اور خود کو مرمت بھی کر سکتے ہیں۔ ان کی سب سے بڑی خصوصیت یہ ہے کہ روشنی کی مدد سے انہیں کسی بھی سمت میں حرکت دی جا سکتی ہے اور ایک مخصوص ترتیب میں ڈھالا جا سکتا ہے۔فی الحال، یہ روبوٹ انسانوں کے ذریعے کنٹرول کیے جا رہے ہیں، مگر اگر انہیں مصنوعی ذہانت یا اے آئی کے ذریعے چلایا جائے تو یہ خودمختار طریقے سے کام کرنے کے قابل ہو سکتے ہیں، جو مستقبل میں روبوٹک ٹیکنالوجی میں ایک بڑی تبدیلی ثابت ہو سکتی ہے۔ یہ حیرت انگیز تحقیق اگرچہ سائنسی ترقی کے لحاظ سے ایک بڑی کامیابی ہے، مگر اس نے کچھ خدشات کو بھی جنم دیا ہے۔
فلم ٹرمینیٹر میں دکھایا گیا تھا کہ خودمختار روبوٹس انسانوں کے لیے خطرہ بن سکتے ہیں۔ اگر یہ روبوٹ مستقبل میں مکمل طور پر مصنوعی ذہانت کے تحت آ گئے تو کیا وہ ہمارے قابو میں رہیں گے؟۔یہ سوالات ابھی تحقیق طلب ہیں، مگر سائنس کی دنیا میں یہ پیش رفت یقینی طور پر ایک انقلابی قدم ہے، جو روبوٹکس، طب، تعمیرات اور دیگر صنعتی شعبوں میں غیر معمولی تبدیلیاں لا سکتی ہے۔
