لاہور(کامرس ڈیسک) پاکستان تحریک انصاف کے فوکل پرسن فوڈ سکیورٹی و خصوصی اقدامات جمشید اقبال چیمہ نے کہا ہے کہ پاکستان میں خوراک میں36 فیصد مہنگائی اور ٹرانسپورٹ میں44 فیصد مہنگائی ہوئی ہے،
اس وقت دنیا میں مہنگائی 10 فیصد جبکہ پاکستان میں 36 فیصد ہے اور خدشہ ہے کہ اگلے سال دنیا میں مہنگائی 3 سے 4 فیصد جبکہ پاکستان میں اس سے بھی آگے جائے گی۔ڈی جی پی آر میں پریس کانفرنس کرتے ہوئے انہوں نے کہا کہ امپورٹڈ اور نااہل حکومت کے ہوتے ہوئے مہنگائی میں کمی ہوتی نظر نہیں آرہی،گزشتہ 8 ماہ میں پاکستان میں لوگوں کی آمدنی کم ہوئی ہے اورمہنگائی بڑھی ہے،مارچ میں 90 لاکھ لوگ بے روزگار تھے جبکہ اب دو کروڑ سے زائد لوگ بے روزگار ہیں۔
گزشتہ سال مارچ تک پاکستان دنیا میں تین چیزوں میں سب سے سستا تھاجس میں ایک خوراک،دوسرا کرایہ داری اور تیسرے نمبر پر تعلیم تھی ، آج پاکستان مہنگے ترین ممالک کی فہرست میں چلا گیا ہے ،اس حکومت نے کسان کے ساتھ فراڈ کیا نہ کہ کسان کو سپورٹ کیا،ٹریکٹر،کھاد اور ادویات میں کسان کو سپورٹ نہیں کیا گیا،تحریک انصاف کی حکومت میں تین سو اسی ارب کی سبسڈی یوریا کھاد پر دی گئی۔
٭
