اسلام آباد (کامرس ڈیسک)حکومت کو رواں برس حج آپریشن سے 44کروڑ 40لاکھ ڈالر آمدن متوقع ہے۔
تفصیلات کے مطابق حکومت نے رواں برس حج پالیسی میں کچھ تبدیلیاں کی ہیں، جس کے تحت سرکاری اور پرائیوٹ اسکیم کے تحت 50، 50 فیصد کوٹہ تقسیم کیا جائے گا۔حج پالیسی کے تحت درخواست دہندگان کیلئے بینک اکائونٹ ، قومی شناختی کارڈ اور 26دسمبر 2023تک کارآمد پاسپورٹ ہونا لازمی ہے۔
سرکاری سکیم کے تحت 3فیصد کوٹہ ہارڈشپ کیسز کیلئے ہوگا جبکہ 300سیٹیں مزدوروں یا کم آمدن والے ملازمین کیلئے ہوں گی، ان ملازمین کا تعلق ای او بی آئی اور ورکرز ویلفیئر بورڈ سے رجسٹرڈ کمپنیوں سے ہونا چاہئے جبکہ اسلام آباد ایئرپورٹ پر عازمین حج کیلئے روڈ ٹو مکہ منصوبہ برقرار رہے گا۔
رواں برس کے لیے بنائی گئی حج پالیسی میں ملک کو درپیش معاشی بحران کے باعث زرمبادلہ کے ذخائر کو مدنظر رکھا گیا ہے۔حکومت کو رواں برس حج آپریشن سے 44کروڑ 40لاکھ ڈالر آمدن متوقع ہے جو کہ پاکستانی کرنسی میں 121ارب 10کروڑ 82لاکھ روپے سے زائد بنتے ہیں۔سرکاری حج کوٹہ کی سپانسرشپ سکیم کے تحت 19کروڑ 40لاکھ ڈالر آمدن کا تخمینہ لگایا گیا ہے جبکہ نجی حج سکیم کے ذریعے 25کروڑ ڈالر ریونیو حاصل ہونے کا اندازہ ہے۔
