لاہور (نمائندہ خصوصی) پاکستان تحریک انصاف کے وائس چیئرمین شاہ محمود قریشی نے کہاہے کہ حکومت عمران خان کی مقبولیت سے گھبرائی ہوئی ہے،
سیاسی سرگرمیوں سے توجہ ہٹانے کے لیے ہمیں کیسز میں الجھایا جا رہا ہے،انکی کوشش ہے کہ عمران خان کو گرفتار کیا جائے لیکن تاریخ بتاچکی ہے کہ مائنس ون فارمولا نہ کبھی پہلے چلا نہ اب چلے گا،بظاہر پنجاب میں نگران سیٹ اپ ہے لیکن عملا پی ڈی ایم سوچ نظر آتی ہے۔سیشن عدالت لاہور میں میڈیا سے گفتگو کرتے ہوئے انہوںنے کہا کہ حکومت سمجھتی ہے کہ عمران خان کو جیل میں ڈال دینے سے حکومت کو الیکشن جیتنے میں آسانی ہوگی۔
حکومت سمجھتی ہے کہ مائنس ون فارمولے سے حکومت کیلئے آسانی ہوگی لیکن تاریخ بتاچکی ہے کہ مائنس ون فارمولا نہ کبھی پہلے چلا نہ اب چلے گا۔عمران خان کی گرفتاری پر قانونی راستہ اپنائیں گے۔شاہ محمود قریشی نے کہا کہ ہم ایک پارٹی کے قانون کو ماننے والے ہیں، ہم نے عدلیہ کا ہمیشہ احترام کیا اور آئندہ بھی کریں گے، 8مارچ کو جو فسطائیت کا مظاہرہ کیا گیا وہ پوری قوم نے دیکھا، پولیس کا رویہ سب کے سامنے ہے، نہتے لوگوں اور خواتین پر پولیس حملہ آور ہوئی، لاٹھیوں سے درجنوں گاڑیوں کے شیشے توڑے گئے۔انہوں نے کہا کہ جو کچھ شہید کارکن کے ساتھ ہوا سب نے دیکھا، حقائق پر مبنی فوٹیج ہے، جس نے بنائی ہے اس نے خود اعتراف کیا کہ یہ تازہ ہے پرانی نہیں، پوسٹ مارٹم رپورٹ میں تشدد کا واضح ذکر ہے،
افسوس کی بات یہ ہے والد کی خواہش کے مطابق ایف آئی آر درج نہیں ہوسکی، وارث موجود ہیں، پولیس کی مدعیت میں ایک ایف آئی آر کاٹی گئی۔شہید ہمارا کارکن ہوا، مظلوم ہم اور قتل کا مقدمہ عمران خان اور پی ٹی آئی کی قیادت پر ہوا، ایسے ہتھکنڈوں سے تحریک انصاف کو روک نہیں پائیں گے۔وائس چیئرمین تحریک انصاف نے کہا ہک لاہور میں وہی سوچ اور انتظامیہ مسلط ہے جس نے 25مئی کو طوفان بدتمیزی برپا کیا تھا۔8مارچ 25مئی کی سوچ کا ہی تسلسل ہے، ایسے واقعات انسانی بنیادی حقوق کی خلاف ورزی ہیں،جو کارکن کے ساتھ ظلم ہوا دنیا نے اس کا نوٹس لیا ہے۔انہوں نے کہا کہ لاہور کے ہر مقام پر کنٹینرز لگا دیے گئے ہیں، شہریوں کو مشکلات پیش آرہی ہیں، اس حکومت نے تمام شہریوں کے حقوق متاثر کیے۔انہوں نے کہا کہ بظاہر پنجاب میں نگران سیٹ اپ ہے لیکن عملا پی ڈی ایم سوچ نظر آتی ہے، سیاسی سرگرمیوں سے توجہ ہٹانے کے لیے ہمیں کیسز میں الجھایا جا رہا ہے۔
