کراچی: حج آپریشن 2025 کی تیاریوں کو مکمل کر لیا گیا ہے اور 29 اپریل کو جناح ٹرمینل ائیرپورٹ سے پہلی حج پرواز نجی پاکستانی ایئرلائن آپریٹ کرے گی۔
ڈپٹی ڈائریکٹر حج گلزار سومرو نے بتایا کہ حج 2025 کے آغاز کے سلسلے میں، جناح ٹرمینل کراچی سے پہلی حج پرواز، جو کہ نجی ایئرلائن سیرین ایئر کی ای آر 1611 ہوگی، 29 اپریل کو رات 10:15 بجے روانہ ہوگی۔ یہ پرواز براہ راست مدینہ منورہ کے لیے روانہ ہو گی اور 285 عازمین حج کو حجاز مقدس پہنچائے گی۔
انہوں نے مزید بتایا کہ کراچی سے حج کی دوسری پرواز بھی نجی ایئرلائن ائیربلیو کے ذریعے روانہ کی جائے گی۔ یہ پرواز 30 اپریل کو صبح 3:40 پر پی اے 1766 کی پرواز سے 148 عازمین حج کے ہمراہ روانہ ہوگی۔
گلزار سومرو نے مزید کہا کہ کراچی سے سعودی ایئرلائن کی پہلی پرواز ایس وی 3701 یکم مئی کو صبح 9:15 بجے روانہ ہوگی، جس کے ساتھ 365 عازمین حج سعودی عرب پہنچیں گے۔ اس کے بعد 2 مئی کو پی آئی اے کی پرواز پی کے 743 صبح 5:55 بجے 393 عازمین حج کے ہمراہ مدینہ منورہ روانہ ہوگی۔
انہوں نے کہا کہ ابتدائی حج پروازیں مدینہ منورہ ائیرپورٹ پر اتریں گی، لیکن 14 مئی سے بیشتر حج پروازیں جدہ کے لیے روانہ ہوں گی، اور کچھ پروازیں مدینہ منورہ کی جانب روانہ ہوں گی۔
ڈپٹی ڈائریکٹر حج نے بتایا کہ کراچی اور متعلقہ ادارے عازمین کی باعزت اور باوقار روانگی کے لیے مکمل طور پر تیار ہیں اور انہیں ہر ممکن سہولت فراہم کرنے کے لیے پرعزم ہیں۔
