لاہور ( ایجوکیشن رپورٹر)گورنمنٹ کالج یونیورسٹی لاہور کا 23واں کانووکیشن اختتام پذیر،دو روزہ کانووکیشن میں 3078 طلبا و طالبات کو میڈلز، رول آف آنر اور ڈگریاں دی گئیں۔
پہلے روز86 سکالرز کو پی ایچ ڈی جبکہ 735 طلبا و طالبات کو ایم فل کی ڈگریوں سے نوازا گیا۔ دوسرے دن کے سیشن میں نصابی اور ہم نصابی سرگرمیوں میں بہترین کارکردگی پر طلبا و طالبات کو میڈلز اور رول آف آنر سے نوازا گیا۔ گورنر پنجاب سردار سلیم حیدر خان کی بطور مہمانِ خصوصی شرکت کی اوروائس چانسلر پروفیسر ڈاکٹر محمد علی شاہ کے ہمراہ طلبا کو میڈلز دیئے جبکہ ڈین فیکلٹی آف آرٹس اینڈ سوشل سائنسز پروفیسر ڈاکٹر بابر عزیز، کنٹرولر امتحانات شہزاد احمد، اور ایڈیشنل رجسٹرار ڈاکٹر شوکت علی بھی اس موقع پر موجود تھے۔
گورنر پنجاب سردار سلیم حیدر خان کا کہنا تھا کہ جی سی یونیورسٹی ایک عظیم درسگاہ ہے، یہاں آ کر مجھے بہت سکون محسوس ہوا،بہت سے تاریخی اداروں میں تنزلی دیکھی، لیکن خوشی ہوئی کہ گورنمنٹ کالج نے آج بھی اپنا معیار اور نام برقرار رکھا۔ان کا مزید کہنا تھا کہ صرف ڈگری کافی نہیں، نوجوانوں کی کردار سازی پر بھی توجہ دینی ہوگی،پاکستان ہے تو ہم ہیں، اس کے بغیر ہم کچھ بھی نہیں۔ انہوں نے طلبا کو تلقین کی کہ آج آپ کی زندگی کا ایک باب ختم ہوا ہے، اب آپ نے اپنے ملک کی بہتری کے لیے اہم کردار ادا کرنا ہے۔
وائس چانسلر پروفیسر ڈاکٹر محمد علی شاہ کا کہنا تھا کہ درسگاہوں کا اولین فریضہ آپ کو بہترین انسان بنانا ہے،جی سی یونیورسٹی میں آپ کو علم اور سکون نظر آتا ہے۔انہوں نے طلبا کو کہا کہ آپ کو فخر ہونا چاہیے کہ آج آپ شاعر مشرق علامہ اقبال کی درسگاہ سے گریجویٹ ہو رہے ہیں، جی سی یو میں بڑی تعداد میں طلبا پنجاب گورنمنٹ اور جی سی یو اینڈومینٹ فنڈ سے اسکالرشپس پر تعلیم حاصل کر رہے ہیں۔
ہم نصابی سرگرمیوں میں اعلی کارکردگی کا مظاہرہ کرنے پر محمد عبداللہ کو محمد ادریس میڈل،عرفہ زبیر خان کو ولید اقبال میڈل،عمر احمد کو محمد شہباز شریف میڈل، ذیشان علی شیخ صفدر علی میڈل، سید محمد نقی کو تھیسپین میڈل، تانیہ کو مدیحہ گوہر میڈل،جبکہ انٹر میڈیٹ کے بہترین طالبعلم کے طور پر محمد طحہ طاہر،محمد احمد،علی رشید، میاں محمد یوسف کو داد الیاس میڈل سے نوازا گیا۔بعدازاں گورنر پنجاب نے جی سی یو نذیر احمد میوزک سوسائٹی کے اعزاز میں گورنر ہاس میں ایک خصوصی تقریب کے انعقاد کا اعلان بھی کیا۔
