جنگی جنون خطرناک انجام لا سکتا ہے، پاکستان کا بھارت کو واضح پیغام

اسلام آباد:
وزیر دفاع خواجہ آصف نے بھارت کو خبردار کیا ہے کہ کسی بھی مہم جوئی کی صورت میں پاکستان بھرپور اور دوٹوک جواب دینے کے لیے مکمل تیار ہے۔

میڈیا سے گفتگو کرتے ہوئے ان کا کہنا تھا کہ لائن آف کنٹرول پر حالات کشیدہ ہو رہے ہیں، اور اگر بھارت نے کوئی جارحانہ قدم اٹھایا تو اسے ماضی کی طرح بھاری قیمت چکانی پڑے گی۔

انہوں نے یاد دلایا کہ بھارتی فضائیہ کو 2019 میں بھی ایسی مہم جوئی کا مزہ چکھنا پڑا تھا، جب ان کے پائلٹ ابھی نندن کو گرفتار کر کے "چائے پلائی” گئی تھی۔

خواجہ آصف نے بھارتی میڈیا کو شدید تنقید کا نشانہ بناتے ہوئے کہا کہ ان کی رپورٹنگ پروپیگنڈہ سے زیادہ بالی ووڈ کا سین محسوس ہوتی ہے۔ انہوں نے یہ بھی الزام لگایا کہ بھارت خود دہشت گرد تنظیموں کو پاکستان کے اندر استعمال کر رہا ہے۔

برطانوی میڈیا سے گفتگو میں وزیر دفاع نے کہا کہ اگر بھارت نے اشتعال انگیزی کی، تو اس کے اثرات صرف پاکستان یا بھارت تک محدود نہیں رہیں گے بلکہ پورا خطہ غیر محفوظ ہو سکتا ہے۔ دنیا کو اس سنجیدہ خطرے کا ادراک ہونا چاہیے۔