لاہور: پاکستان کی معروف ٹک ٹاک اسٹارز اور سوشل میڈیا انفلوئنسرز جنت مرزا اور ان کی بہن علشبہ انجم نے اپنے والدین کے ساتھ حج کی سعادت حاصل کرنے کے لیے سعودی عرب کا روحانی سفر اختیار کر لیا۔
جنت مرزا نے اپنے انسٹاگرام اکاؤنٹ پر اس بابرکت سفر کی جھلکیاں مداحوں کے ساتھ شیئر کی ہیں، جن میں وہ احرام میں ملبوس اپنے اہل خانہ کے ہمراہ نظر آ رہی ہیں۔ ان کے لاکھوں فالورز کی جانب سے انہیں دعاؤں اور نیک خواہشات کے پیغامات موصول ہو رہے ہیں۔
جنت مرزا، جن کے انسٹاگرام پر 6.1 ملین اور ٹک ٹاک پر 25.6 ملین فالورز ہیں، اپنی بہن علشبہ کے ساتھ اکثر دلکش فوٹو شوٹس اور سوشل میڈیا پر متحرک انداز کی وجہ سے خبروں میں رہتی ہیں۔
تاہم، اس مرتبہ ان کی حج روانگی نے جہاں مداحوں کے دل جیت لیے، وہیں کچھ صارفین کی جانب سے ان کے میک اپ اور مبینہ اسپانسر شپ پر تنقیدی سوالات بھی کیے گئے۔ کئی صارفین نے تبصرہ کیا کہ کیا یہ سفر خلوص پر مبنی ہے یا شہرت کی ایک اور شکل؟
دوسری جانب، بہت سے مداحوں نے دعا کی کہ اللہ تعالیٰ ان کا یہ سفرِ حج قبول فرمائے اور انہیں ہدایت و بخشش کا ذریعہ بنائے۔
