غزہ،بیروت،صنعا،واشنگٹن (انٹر نیشنل نیوز)غزہ میں جمعتہ الوداع کی رات بھی صیہونی فوج نے بموں کی برسات کردی،ایف سولہ طیاروں کی بمباری اور ڈرون حملوں میں گزشتہ 24گھنٹوں کے دوران خواتین وبچوں سمیت مزید 50 فلسطینی شہید ہوگئے۔
غیرملکی میڈیا کے مطابق اسرائیلی فوج کے گزشتہ 24 گھنٹوں میں جنوبی غزہ سمیت مختلف علاقوں میں بمباری کی۔ اسرائیلی ٹینکوں نے رفح اور خان یونس میں پناہ گزین کیمپوں پر گولہ باری کی۔ اسرائیل کے وحشیانہ حملوں میں خواتین اور بچوں سمیت 50 فلسطینی شہید ہوگئے۔ شہید ہونے والوں میں ماں اور بیٹا بھی شامل ہیں۔ اسرائیلی حملوں میں زخمی ہونے والوں متعدد فلسطینیوں کی حالت نازک ہے۔ اسرائیلی جنگی طیاروں نے غزہ کے شمالی علاقے میں رہائشی عمارت کو بھی نشانہ بنایا۔ راشن تقسیم کرنے والے مرکز پر بھی بمباری کی گئی۔ اسرائیلی فورسز کے جانب سے غزہ پر مسلسل 12 روز سے حملے جاری ہیں۔
یہ حملے مختصر وقت کی جنگ بندی کے بعد شروع کیے گئے۔اقوام متحدہ کے مطابق اسی فیصد امدادی سرگرمیاں معطل ہیں،خوراک اور ادویات کا چند دن کا اسٹاک رہ گیا،انسانی المیہ جنم لینے لگا،برطانیہ اور فرانس کی درخواست پر سلامتی کونسل کا ہنگامی اجلاس طلب کرلیا گیا ۔دریں اثنا دنیا بھر کے مسلمانوں نے جمعة الوداع کوفلسطینیوں سے اظہاریکجہتی کے لیے یوم قدس منا یا ،پاکستان سمیت دنیا کے تمام مسلم ممالک میں ریلیاں نکالی گئیں ۔اسرائیلی پارلیمنٹ کے باہر ہزاروں افرادنے احتجاج کیا،مظاہرین نے نیتن یاہو سے مستعفی ہونے کا مطالبہ کردیا۔علاوہ ازیں امریکی یونیورسٹیوں میں فلسطین کے حامی غیر ملکی طلبہ کے خلاف کریک ڈاﺅن تیز کردیا گیا۔
امریکی وزیر خارجہ مارکو روبیو نے تصدیق کی ہے کہ ٹفٹس یونیورسٹی کی ترک طالبہ رومیسہ اوزترک کا ویزہ منسوخ کردیا گیا ہے، رومیسہ کو گزشتہ روز میسا چیوسٹس میں گھر کے باہر سے گرفتار کیا گیا۔اس کے علاوہ ٹرمپ انتظامیہ نے الباما یونیورسٹی کے ایرانی طالب علم کو حراست میں لینے اور ویزہ منسوخ کرنے کی تصدیق کردی۔ ادھر لبنان میں بھی ڈرون حملوں کے دوران حزب اللہ کمانڈر سمیت 4 افراد کوشہید کردیا گیا۔ دوسری جانب یمن پر امریکی حملے جاری ہیں اور چند گھنٹوں کے دوران حوثیوں کے زیر کنٹرول علاقوں پر 37 حملے کیے گئے۔
