مشہور گلوکار جسٹن بیبر کافی شاپ کے باہر اپنے تصاویر لینے کے لیے موجود پاپرازی پر غصے کا اظہار کرتے ہوئے دکھائی دیے، جس سے مداحوں میں تشویش کی لہر دوڑ گئی ہے۔
غیر ملکی میڈیا کے مطابق، کوچیلا فیسٹیول سے کچھ دن قبل، 31 سالہ جسٹن بیبر اپنے دوستوں کے ہمراہ ایک کافی شاپ پہنچے، جہاں پہلے سے موجود فوٹوگرافرز کو دیکھ کر وہ برہم ہو گئے۔ ایک فوٹوگرافر نے انہیں "گڈ مارننگ” کہا، جس پر بیبر نے غصے سے جواب دیا، "نہیں! گڈ مارننگ نہیں! تمہیں پتہ ہے تم کیوں آئے ہو؟” گلوکار نے "پیسہ، پیسہ، پیسہ” کہتے ہوئے مزید کہا کہ "تم لوگوں کو صرف پیسہ چاہیے، انسانیت کی کوئی پرواہ نہیں۔”
اس واقعے کی ویڈیو سوشل میڈیا پر وائرل ہو گئی، جس پر مداحوں نے بیبر کے رویے اور ان کی حالیہ حالت پر تشویش ظاہر کی ہے۔ ان دنوں گلوکار کے بارے میں منشیات کے استعمال اور ازدواجی مسائل کی افواہیں بھی گردش کر رہی ہیں، تاہم ان کے نمائندے نے ان افواہوں کی سختی سے تردید کی ہے۔
یاد رہے کہ فروری میں بھی جسٹن بیبر اپنی اہلیہ ہیلی بیبر کے برانڈ کے ایونٹ میں بے چینی کا شکار نظر آئے تھے، جس پر قریبی ذرائع نے کہا تھا کہ ہیلی ان کے لیے پریشان ہیں، مگر یہ واضح نہیں ہو سکا کہ اس بے چینی کا اصل سبب کیا ہے۔
