جدہ(نیوز رپورٹر)وفاقی وزیر برائے تجارت جام کمال خان نے اسلامی تعاون تنظیم (او آئی سی) کے سیکرٹری جنرل حسین ابراہیم طہ سے جدہ میں ملاقات کی، جس میں او آئی سی رکن ممالک کے درمیان اقتصادی، تجارتی اور ترقیاتی تعاون کو فروغ دینے کے امکانات پر گفتگو کی گئی۔
ملاقات کے دوران، وزیر تجارت جام کمال خان نے او آئی سی کے ساتھ پاکستان کے گہرے روابط کے عزم کا اعادہ کیا اور کہا کہ مسلم دنیا میں اقتصادی اور اسٹریٹجک تعلقات کو مضبوط بنانے کے لیے اعلیٰ سطحی ملاقاتیں انتہائی اہم ہیں۔
انہوں نے پاکستان کے وزیرِاعظم کی جانب سے او آئی سی سیکرٹری جنرل کا شکریہ ادا کیا کہ انہوں نے 11ـ12 جنوری 2025 کو اسلام آباد میں منعقدہ مسلم کمیونٹیز میں لڑکیوں کی تعلیم پر بین الاقوامی کانفرنس میں شرکت کی۔
وزیر نے او آئی سی کی خواتین کے حقوق کے فروغ کے لیے کی جانے والی کوششوں کو بھی سراہا۔وزیر تجارت نے او آئی سی ممالک کے درمیان اقتصادی اور تجارتی روابط کی اہمیت پر زور دیتے ہوئے کہا کہ یہ خوشحالی اور استحکام کے فروغ میں کلیدی کردار ادا کرتے ہیں۔ انہوں نے او آئی سی کے سیکرٹری جنرل کی قیادت کو سراہتے ہوئے کہا کہ ان کی زیرِ نگرانی کیے گئے اقدامات سے رکن ممالک کے درمیان تجارتی تعاون میں نمایاں اضافہ ہو رہا ہے۔
وزیر تجارت جام کمال خان نے او آئی سی کے سیکرٹری جنرل کو جدہ انٹرنیشنل ایگزیبیشن اینڈ کنونشن سینٹر میں جاری ”میڈ ان پاکستان” نمائش کا دورہ کرنے کی دعوت دی اور اس ایونٹ کو پاکستانی صنعت کی طاقت کو اجاگر کرنے والا ایک اہم سنگِ میل قرار دیا۔ انہوں نے مزید کہا کہ یہ نمائش او آئی سی ممالک کے ساتھ اقتصادی تعاون کو وسعت دینے کے لیے ایک بہترین پلیٹ فارم مہیا کر رہی ہے۔
وزیر نے اس موقع پر پاکستان کی جانب سے لاہور میں رواں سال منعقد ہونے والی 18ویں او آئی سی تجارتی نمائش کے انعقاد کے عزم کا اعادہ کیا اور او آئی سی کی حمایت حاصل کرنے کی درخواست کی تاکہ یہ ایونٹ کامیابی سے ہمکنار ہو سکے۔او آئی سی کے سیکرٹری جنرل حسین ابراہیم طہ نے پاکستان کے او آئی سی میں اقتصادی انضمام کو فروغ دینے کے اقدامات کو سراہا اور رکن ممالک کے درمیان تجارت اور ترقی کے فروغ کے لیے پاکستان کی کوششوں کو قابلِ تحسین قرار دیا۔
انہوں نے اس بات پر زور دیا کہ او آئی سی تجارت، سرمایہ کاری، اور پائیدار ترقی کے فروغ کے لیے پرعزم ہے اور پاکستان کے ساتھ مل کر ان مقاصد کو آگے بڑھانے کے لیے تیار ہے۔
ملاقات کے اختتام پر، وزیر تجارت جام کمال خان نے او آئی سی کے معزز مہمانوں کی کتاب میں اپنے تاثرات قلمبند کیے اور مسلم امہ کے اتحاد اور ترقی کے لیے او آئی سی کے کردار پر بھرپور اعتماد کا اظہار کیا۔ دونوں فریقین نے باہمی ترقی کے لیے مشترکہ کوششوں کو تیز کرنے اور او آئی سی ممالک کے درمیان تجارت، سرمایہ کاری، اور ترقیاتی شراکت داری کو مزید مستحکم بنانے کے عزم کا اعادہ کیا۔
