لاہور( نمائندہ خصوصی )وزیر اعظم کے مشیر برائے امور آزاد کشمیر و گلگت بلتستان قمر زمان کائرہ نے کہا ہے کہ جب تک بلاول بھٹو حکومت کا حصہ ہے ملک ڈیفالٹ نہیں کرے گا،
ہمارے آنے کے بعد بجلی، گیس مہنگی ہوئی ہے، ہمیں اندازہ ہے کہ لوگ ناراض ہیں، بچے بھوکے ہیں بلاول بھٹو کو احساس ہے،اگر ہم یہ فیصلے نہ کرتے تو پاکستان ڈیفالٹ کر جاتا، نوجوانوں عمران خان کی باتوں میں نہیں آنا، نوجوان لیڈر بلاول بھٹو ہے اس کے ویژن پرعمل کرو،قومیں اور جماعتیں اپنی عظیم شخصیات کے دن مناتی ہیں ،یہ وہ شان ہے کہ گلی گلی میں بھٹو کے نعرے لگتے ہیں،بھٹو 37برس بعد بھی عوام کے دلوں میں زندہ ہے ،پیپلز پارٹی کو کبھی حکومت نہیں ملی بلکہ بحران ملتے ہیں،1967-68کے پاکستان اور آج کے پاکستان کے حالات ایک جیسے ہیں۔
ان خیالات کا اظہار پیپلز پارٹی کے بانی چیئرمین ذوالفقار علی بھٹو کی سالگرہ کی مناسب سے منعقدہ تقریب سے خطاب کرتے ہوئے کیا ۔ اس موقع پر چودھری منظور،حسن مرتضی،شہزاد سعید چیمہ،اسلم گل،جمیل منج،احسن رضوی،فائزہ ملک،اشرف خان، امجد جٹ،رانا عرفان،چودھری عاطف رفیق،آ صف ناگرہ،ممتاز مون خان،زاہد ذوالفقار،سونیا خان،بشری ملک،ذیشان شامی اور دیگر بھی موجود تھے۔تقریب میں ذوالفقا رعلی بھٹو کی سالگرہ کا کیک بھی کاٹا گیا ۔قمر زمان کائرہ نے کہا کہ پنجاب کا وزیر اعلی باہر نکلے تو پتہ چلے کہ باہر کیا ہو رہا ہے ،صوبائی حکومتوں کو اپنی ذمہ داری پوری کرنا چاہیے،پنجاب کا وزیر اعلی کیا کر رہا ہے،گوداموں میں کروڑوں روپے کا مال پڑا ہے اور کہتے ہیں کہ مہنگائی ہو گئی ہے،ملک کے تاجر کے لائف سٹائل میں بہتری آرہی ہے ،بی ایم ڈبلیو کی مہنگی ترین 100گاڑیاں پاکستان کے امرا ء نے بک کرائی ہیں،ہم زمیندار،تاجر اور صنعتکار کے ساتھ ہیں، جو عوام کے ساتھ ہم اس کا ساتھ دیں گے ،ہم اس گروپ اور صنعتکار کاساتھ دیں گے جو عوام کے ساتھ ہو گا۔
انہوں نے کہا کہ بھٹو کو ٹوٹا ہواملک،ہاریاور بد دل قوم ملی تھی،حالات یقینامشکل ہیں اور ملک کو مشکل حالات سے نکالنا پیپلز پارٹی کا ورثہ ہے۔پیپلز پارٹی مفت تعلیم اور اور روزگار بھی دیتی ہے، عوام کے لئے قانون سازی کرتی ہے ۔بی بی شہید نے آ کر ملک سنبھالا تو طالع آزمائوں نے حکومت چھین لی،ہم نے ملکی دفاع،خارجہ پالیسی کو مضبوط کیا،آج پھر پاکستان کے اندر صنعتکاروں اور تاجروں کے مافیاز سرگرم ہیںہم ان سب کا مقابلہ کریں گے۔ہم نیشنلائزیشن نہیں کریں گے مگر عوام کے حقوق پر ڈاکہ نہیں ڈالنے دیں گے،بھٹو شہید نے پاکستان کو دنیا کے باوقار اقوام میں کھڑا کیا ۔
آج نوجوان ڈگریاں ہاتھوں میں لیے بیروزگاری کی چکی میں پس رہا ہے ،ہسپتال مافیا عوام کو دونوں ہاتھوں سے لوٹ رہا ہے،نا جائز منافع خور ی سے عام آدمی کی جیب پر ڈاکہ ڈالا جا رہا ہے۔ملک میں تعلیم اور صحت کے نظام کو مفت کرنا ہو گا اورپیپلز پارٹی یہ کر کے دکھائے گی۔انہوں نے کہا کہ خان صاحب کو کون سی گولی لگ گئی کہ اٹھتے نہیں،ہم عمران نہیں اس کی سوچ کے خلاف ہیں،عمران خان اور اس کے ہینڈلر زایک دوسرے کے کپڑے اتار رہے ہیں،کس طرح راتوں رات عمران مضبوط ہو گیا ،آج اگر کوئی اپنی جماعت میں واپس آ رہیںہیں تو عمران خان پریشان ہیں،ہم توڑنے والے نہیں،پیپلز پارٹی میں ہی پاکستان کی بقاء ہے ۔
انہوں نے کہا کہ ہمارے کارکنوں کو جیلوں میں ڈالا گیا،خان صاحب قوم کو بتا ہمارے دور میں 26ارب کی تجارت تھی،برآمدات اور درآمدات میں50ارب کا گیپ عمران کی نالائقیوں سے پیدا ہو،رئیل سٹیٹ مافیا نے بھی لوٹ سیل لگا رکھی ہے۔عمران قوم تم سے پوچھتی ہے کہ اس کا لٹا ہوا پیسہ کب واپس آئے گا،عمران خان تم خواب نہیں سراب ہو،تم ادھارا لیا ہوا تانگہ ہو جس میںمانگے تانگے کی سواریاں لادھی گئی تھیں۔انہوںنے کہا کہ آج دہشتگردی جڑ پکڑ رہی ہے یہ تمہاری وجہ سے ہے ،تمہارے بھائی ہمارے بچوں اور عبادت گاہوں اور دفاعی اداروں پر حملے کرتے ہیں،اگر انہوں نے رشتہ بنانا ہے تو کم از کم آئین پاکستان تسلیم کرنا ہو گا۔انہوں نے کہا کہ کشمیر کا صرف ایک حل استصواب رائے ہے،خان صاحب کے دور میں کشمیر پر بیک ڈور ڈپلومیسی ہوئی،قسم خدا کی ہم اللہ کے نبی اور بھٹو کے فالور ہیں،آج بھی بھٹو کے رستے پر چل کر ملک کو مشکلات سے نکالا جا سکتا ہے،وژن ہو تو ہر مسئلہ حل ہو جاتا ہے۔
انہوں نے کہا کہ ہم اس وقت معاشی طور پر کمزور ملک ہیں،ہمیں عالمی اداروں کا تعاون چاہیے،سعودی عرب اور امارات کے ساتھ خان صاحب نے تعلقات خراب کیے۔ہم امریکہ کے غلام نہیں،ہمارے قائد نے امریکہ کے وزیر خارجہ اور صدر کی آنکھوں میں آنکھیں ڈال کر بات کی،منہ اوپر کر کے تھوک پھینکنے والوں پر ہی واپس گرتی ہے،بلاول بھٹو کے وزیر خارجہ بننے کے بعد پوری دنیا آپ کے ساتھ ہے،سی ای سی نے فیصلہ کیا ہے کہ وفاقی وزرا ء لاہور آ کر بیٹھا کریں گے ،ہمیں پتہ ہے کہ مہنگائی ہوئی ہے،قسم اٹھا کر کہتا ہوں کہ بلاول بھٹو کو اس کا احساس ہے۔پی ٹی آئی کی ویب سائٹس پر عوام کو کہا جا رہا ہے کہ ملک ڈیفالٹ کرنے والا ہے ،جب تک بلاول حکومت کا حصہ ہے ملک اور نہ قوم ڈیفالٹ کرے گی ۔
اگلی نسل سراب دکھانے والوں سے بچے۔حسن مرتضی نے کہا کہ آج اپنی پارسائی کا دعوی کرنے والی کی حکومتوں نے ملک کو بہت نقصان پہنچایا ہے،حکومت پنجاب اسمبلی میں اعتماد کا ووٹ لینے میں ناکام ہو چکی ہے،آج وہ اپنی عددی اکثریت سامنے نہیں لا سکے،جیالوں کی جدوجہد فائنل مرحلے میں پہنچ چکی ہے،پیپلز پاٹی کی جب بھی حکومت آئی ہے خوشحالی آئی ہے،وہ دن دور نہیں جب فتح غریب عوام کی ہو گی۔اسلم گل نے کہا کہہمارے کارکنوں نے بھٹواور بی بی شہید کے لئے جدوجہد کی ہے،آج پیپلز پارٹی چالیس پچاس بندوں والی جماعت نہیں،لاہور میں پیپلز پارٹی مضبوط و منظم ہو رہی ہے،
بلاول بھٹو کی قیادت میں بھٹو شہید کا مشن پورا کریں گے۔ انہوں نے کہا کہ مارشل لائوں اور آمریت کے باوجود پیپلز پارٹی آج بھی زندہ ہے،پیپلز پارٹی لاہور کی گاڑی پٹڑی پر چڑھ گئی ہے،نیازی ٹولے نے پاکستان کو مشکل میں ڈال دیا ہے،لچے لفنگوں کے ٹولے نے پاکستان پر بھوک کا ظلم مسلط کیا ہے،پیپلز پارٹی اور اس کی قیادت نے ہمیشہ اپنی گردن اونچی رکھی ہے جیالو اٹھ کھڑے ہو،ہم نے بلاول بھٹو کو وزیر اعظم پاکستان بنانا ہے۔تمام ڈسٹرکٹ ،زون اور ذیلی تنظیمیں اپنے آپ کو مضبوط کریں۔اس موقع پر دیگر نے بھی خطاب کیا ۔
