تمام مقدمات جعلی ہیں، عوام دیکھ رہی ہے کہ یہ کیا سرکس جاری ہے،شبلی فراز

اسلام آباد(نیوز رپورٹر) پاکستان تحریک انصاف کے رہنما شبلی فراز نے کہا ہے کہ تمام مقدمات جعلی ہیں، عوام دیکھ رہی ہے کہ یہ کیا سرکس جاری ہے۔

سپریم کورٹ کے باہر میڈیا کے نمائندوں سے بات کرتے ہوئے پاکستان تحریک انصاف کے رہنما شبلی فراز نے کہاکہ تمام مقدمات مکمل طور پر جعلی مقدمات ہیں،لوگ اس ملک سے فرار ہونے کی کوشش کر رہے ہیں۔ انہوںنے کہاکہ نیب کی جانب سے جو تفصیلات بتائی گئی ہیں 40 ارب سے زائد کا سرمایہ اس ملک سے چلا گیا ہے،ہم بھیک مانگ رہے ہیں۔

شبلی فراز نے کہاکہ ایسی صورتحال میں نقصان صرف عوام کا ہو گا،گزشتہ روز کی کانفرس میں فسطائیت کی انتہا کر دی گئی،یہ اپنے آپ کو سیاسی اور اخلاقی طور پر اتنا کمزور سمجھتے ہیں کہ ایک کانفرنس کا انعقاد بھی نہیں ہونے دیتے۔ انہوںنے کہاکہ ملک کی بھلائی کے لئے کوئی پلان نہیں ہے،وزیروں کا ایک جھرمٹ انھوں نے شامل کیا ہے۔اْنہوںنے کہاکہ ایسے لوگوں کو نوازا گیا ہے جنھوں نے اپنے ضمیر کو بیچا ہے۔ پاکستان کی عوام یہ دیکھ رہے ہیں کہ یہ کیا سرکس جاری ہے۔

عدالت کے باہر ہی موجود رہنما پاکستان تحریکِ انصاف عالیہ حمزہ نے کہا کہ اس حکومت کا فسطائیت کا چہرہ سب کے سامنے ہے، یاسمین راشد، عمر چیمہ کسی کی ضمانت نہیں ہو رہی، ہمیں فئیر ٹرائل کا حق بھی نہیں دیا جا رہا۔ انہوںنے کہاکہ سپریم کورٹ میں ان ضمانتوں کو چیلنج کرنے آئی تھی، عوام کے ٹیکس پئیرز کا پیسہ عوام کو دبانے پر استعمال کرنے پر لگے ہوئے ہیں۔انہوںنے کہاکہ اپنی مرضی کے قوانین لانا، اپنے فائدے کے لیے 26ویں آئینی ترمیم پاس کروانا،میڈیا پر پیکا ایکٹ مسلط کر دیا گیا، ایک اپوزیشن الائنس سے کیوں گھبرا رہے ہیں۔ مجھے مینار پاکستان پر ایک جلسہ کرنے کی اجازت دے دیں لوگوں کو گرفتار نا کریں راستے کھول دیں۔عالیہ حمزہ نے کہا کہ مان لیں آپ ہار گئے ہیں وہ ایک شخص جیل میں بیٹھا اپنی عوام کی جنگ لڑ رہا ہے۔
٭٭٭٭٭