کراچی (شوبز ڈیسک)پاکستان شوبز انڈسٹری کے معروف ورسٹائل سینئر اداکار نعمان اعجاز نے حالیہ انٹرویو میں اسٹیبلشمنٹ کے ساتھ اچھے تعلقات ہونے کا اعتراف کیا ہے۔
سینئر اداکار نعمان اعجاز نے حال ہی میں ایک سوشل میڈیا پوڈ کاسٹ میں نجی زندگی سے متعلق گفتگو کرتے ہوئے بتایا کہ کسی بھی رشتے کو بہتر کیسے بنایا جا سکتا ہے۔انہوں نے کہا کہ وہ اپنی بیگم کو اسٹیبلشمنٹ مانتے ہیں اور ان کے ساتھ تعلقات بہت اچھے ہیں۔میزبان نے دریافت کیا کہ کیا شروع سے معاملات ایسے ہی تھے؟
جس پر سینئر اداکار نے بتایا کہ نہیں ابتدا میں کافی لڑائی جھگڑے ہوتے تھے، کئی کئی دن تک کوئی بات نہیں ہوتی تھی لیکن پھر اس بات کا احساس ہوا کہ وہ کتنی بڑی غلطی کر رہے ہیں۔
غلطی کا احساس ہونے کے بعد اب ایسا نہیں ہے، اب اگر کبھی محسوس ہو کہ کسی بات پر جھگڑا ہو سکتا ہے تو ہم دونوں کی یہ ہی کوشش ہوتی ہے کہ موضوع تبدیل کر دیا جائے۔
