بیجنگ، برکس اور پاکستان کا خواب

تحریر کاشف جاوید
بیجنگ میں جو حالیہ اجلاس ہوا ہے، اسے دیکھ کر یوں لگتا ہے جیسے دنیا کے بڑے بڑے لیڈر بھی وہی کرتے ہیں جو ہم کالج کے زمانے میں کیا کرتے تھے۔ کوئی کہتا تھا "یار، گروپ اسٹڈی کریں گے” اور پھر ساری رات پیزا کھانے اور گپیں ہانکنے میں گزر جاتی تھی۔ شنگھائی تعاون تنظیم کے رہنماؤں نے بھی کچھ ایسا ہی کیا۔ ایک طرف چین نے کثیرالجہتی دنیا کا نعرہ لگایا، روس نے ہاں میں ہاں ملائی اور باقی سب نے سر ہلا کر تصویریں کھنچوا لیں۔
اب آتے ہیں برکس کی طرف۔ یہ وہ تنظیم ہے جو کبھی پانچ ملکوں کی ایک چھوٹی سی محفل تھی، مگر آج بی آر آئی سی ایس پلس بن کر اتنی بڑی ہو گئی ہے کہ باراتیوں کے لیے کرسیاں کم پڑ رہی ہیں۔ ایران، سعودی عرب اور یو اے ای جیسے ممالک نے شمولیت اختیار کر لی ہے اور یوں لگتا ہے جیسے کسی پرانے دوستوں کے گروپ میں اچانک امیر رشتہ دار شامل ہو گئے ہوں۔ لیکن مسئلہ یہ ہے کہ یہ سب رشتہ دار آپس میں ہی کم بات کرتے ہیں۔ چین اور برازیل نئی توانائی اور ٹیکنالوجی کی بات کرتے ہیں، روس اور جنوبی افریقہ اب بھی تیل اور گیس کو سینے سے لگائے بیٹھے ہیں۔ ایسے میں برکس کی اجتماعی پالیسی کچھ ویسی ہی لگتی ہے جیسے کوئی خاندان شادی کے کھانے میں اس بات پر جھگڑ پڑے کہ بریانی مرغی کی ہونی چاہیے یا مٹن کی۔
اب سوال یہ ہے کہ پاکستان کہاں کھڑا ہے۔ سیدھی سی بات یہ ہے کہ ہم برکس کے گیٹ کے باہر ایسے کھڑے ہیں جیسے کوئی غریب رشتہ دار شادی میں دعوت نامے کے بغیر آ جائے اور چپکے سے فوٹو گرافر کو کہے کہ بھائی ایک آدھ تصویر تو کھینچ لو۔ پاکستان نے بارہا شمولیت کی خواہش ظاہر کی، مگر بھارت کے ویٹو اور ہماری اپنی کمزوریوں کے باعث اندر داخل نہ ہو سکے۔ امید ابھی باقی ہے کیونکہ سی پیک ہمیں ایک الگ وزن دیتا ہے، لیکن وزن تبھی کارگر ہو گا جب ہم خود اپنے پاؤں پر کھڑے ہوں گے۔
خطے پر اثرات گہرے ہیں۔ اگر برکس اور ایس سی او واقعی مضبوط ہو گئے تو امریکا اور مغرب کا یکطرفہ دباؤ کمزور پڑے گا۔ لیکن یہاں سوال یہ ہے کہ ہم نے اس موقع سے فائدہ اٹھانے کے لیے خود کیا تیاری کی ہے۔ ہماری معیشت کا حال اس مریض جیسا ہے جسے ڈاکٹر سختی سے کہے کہ "چکنائی بند کرو” اور مریض اسپتال سے نکلتے ہی نہاری کا آرڈر دے دے۔
دنیا تیزی سے بدل رہی ہے، طاقت کا مرکز آہستہ آہستہ مشرق کی طرف منتقل ہو رہا ہے۔ اگر ہم نے وقت پر سمت درست نہ کی تو یہ ٹرین ہمیں اسٹیشن پر ہاتھ ہلاتے چھوڑ دے گی۔ اور پھر ہم وہی پرانا جملہ دہراتے رہ جائیں گے کہ "کاش ہم نے وقت پر ٹکٹ خرید لیا ہوتا۔”

نوٹ: لکھاریوں کےذاتی خیالات سے”قلم کلب”کامتفق ہوناضروری نہیں ہے۔