نئی دہلی(انٹرنیشنل نیوز)بھارتی وزارت خارجہ کے ترجمان ارندم باغچی نے کہا کہ بھارت بھی پاکستان کے ساتھ اچھے، ہمسایہ تعلقات کا خواہاں ہے ۔
پڑوسی ممالک کے ساتھ مذاکرات کے بارے میں وزیر اعظم شہباز شریف کے حالیہ ریمارکس پر ردعمل ظاہر کرتے ہوئے، ہندوستانی دفتر خارجہ نے حال ہی میں کہا کہ وہ پاکستان کے ساتھ اچھے، ہمسایہ تعلقات چاہتا ہے،تاہم اس طرح کے تعلقات کسی بھی قسم کے تشدد کے خوف سے پاک ہونے چاہئیں، اور ایک آزاد ماحول میں استوار ہونے چاہئیں۔
اپنی ہفتہ وار پریس بریفنگ کے دوران، ہندوستانی وزارت خارجہ کے ترجمان نے کہا: “ہم نے پاکستان کے وزیر اعظم شہباز شریف کے تبصروں سے متعلق رپورٹس دیکھی ہیں، تاہم، ‘دشمنی’ سے پاک ماحول ضروری ہے۔”
چند روز قبل وزیر اعظم شہباز شریف نے اسلام آباد میں پاکستان منرلز سمٹ کی افتتاحی تقریب سے خطاب کرتے ہوئے کہا تھا کہ ہم قومی تعمیر کے لیے ہمسایہ ممالک سے بھی بات کرنے کو تیار ہیں بشرطیکہ پڑوسی ممالک بھی سنجیدہ مسائل پر بات کریں۔
انہوں نے کہا کہ دونوں ممالک اس وقت تک اہم پڑوسی نہیں بن سکتے جب تک سنگین مسائل کو پرامن اور بامعنی بات چیت کے ذریعے حل نہیں کیا جاتا کیونکہ جنگیں اب کوئی آپشن نہیں ہیں۔
