کراچی (سپورٹس رپورٹر)پاکستان کے سابق کرکٹر کامران اکمل نے کہا ہے کہ بھارتی ٹیم پاکستان کیخلاف میچ بھی بنگلادیش کی طرح کھیلے گی، بھارتی ٹیم بہت مضبوط ہے۔
نجی ٹی وی کے پروگرام میں اظہار خیال کرتے ہوئے کامران اکمل نے کہا کہ بھارتی ٹیم میں سب میچ ونر کھلاڑی ہیں، بھارت نے بڑے ایونٹس کیلیے اپنی ٹیم کی تیاری کی ہے، ہماری ٹیم کی بولنگ اور بیٹنگ اس وقت اچھی نہیں ہے، قومی ٹیم کی فارم اچھی نہیں تو کسی کو اس وقت جیت کی فکر نہیں۔
کامران اکمل نے کہا کہ ہم اپنی ٹیم کیلیے اسپنر تیار ہی نہیں کرسکے ہیں، ہمارے کمبی نیشن میں اوپنرز ہیں اور نہ اسپنرز ہیں، ہماری ٹیم کی بولنگ فیلڈنگ کے مطابق نہیں ہوتی۔
سابق کرکٹر نے کہا کہ ہماری ٹیم کو آخری اوورز میں پریشانی کا سامنا ہوتا ہے، اس وقت کپتان اور کوچ کو نہیں پتا اوپنر کون ہوگا۔ان کا کہنا تھا کہ ہمارے کپتان اور کوچ کو نہیں پتا کہ آخری اوورز کس کو کرانے ہیں، پاک بھارت میچ میں پریشر دونوں ٹیموں کے کھلاڑیوں پر ہوتا ہے، ہماری ٹیم میں 10 اوورز کے بعد سارے پارٹ ٹائم بالرز ہی ہیں۔
سابق کرکٹر یاسر حمید کا کہنا تھا کہ موجودہ صورتحال میں بھارت کی جیت کا امکان زیادہ ہے، بھارتی ٹیم کی تیاری پوری ہے ہماری اس وقت تیاری نہیں ہے۔انھوں نے کہا کہ پاکستان کو ماضی کی طرح تیز کرکٹ کھیلنی پڑے گی، فخر زمان اور صائم ایوب کے ان فٹ ہونے سے نقصان ہوا۔
