کراچی (کرائم رپورٹر) سکیورٹی فورسز نے بھارت کی خفیہ ایجنسی را کے سلیپر سیل کا ایک اور اہم رکن کراچی سے گرفتارکرلیا۔ ملزم کے خلاف مقدمہ درج کرکے تفتیش کےلیے خفیہ مقام پر منتقل کردیا گیا۔
تفصیلات کے مطابق پاکستانی سکیورٹی فورسز نے خفیہ اطلاع پر بھارتی خفیہ ایجنسی را کے سلیپر سیل کا کارندے کو گرفتارکرلیا ہے۔ ذرائع کے مطابق ملزم کراچی ایئرپورٹ پر سرویلنس یونٹ میں ڈیوٹی کررہا تھا۔ اس ہفتے میں یہ لگاتارسکیورٹری فورسز کی دوسری بڑی کامیابی ہے۔
ذرائع کے مطابق چند روز قبل کراچی میں ہی ایف آئی اے انسداد دہشتگردی ونگ نے کارروائی کرتے ہوئے بھارتی خفیہ ایجنسی را کے سلیپر سیل کے رکن آصف صدیقی کو گرفتار کیا تھا۔ خطرناک ترین بات یہ ہے کہ را کے سلیپر سیل کے ارکان اہم ترین عہدوں پر فائز ہیں چند روز قبل گرفتار ہونے والا آصف صدیقی 17 گریڈ کا سرکاری ملازم تھا، جو کہ قانون نافذ کرنیوالے اداروں سے متعلق معلومات بذریعہ ای میل بھارت بھیجتا تھا، حساس مقامات کی تصاویر اور تفصیلات بذریعہ ای میل بھیج رہا تھا۔
ذرائع کے مطابق ملزم آصف صدیقی بیرون ملک سے پاکستان میں اسلحے کی ترسیل میں بھی ملوث ہے۔ سکیورٹی ذرائع کے مطابق آج گرفتار ہونے والا ملزم 1991 میں سندھ پولیس میں بھرتی ہوا، اور اب کراچی ایئرپورٹ پر سرویلنس یونٹ میں ڈیوٹی کر رہا تھا ملزم 2008 میں ٹریننگ کے لیے بھارت بھی جا چکا ہے۔
ذرائع کے مطابق گرفتارملزم ٹارگٹ کلنگ اور دہشت گردی کی کارروائیوں میں ملوث رہا ہے۔ ملزم کے خلاف مقدمہ درج کرکے تفتیش کے لیے نامعلوم مقام پر منتقل کردیا گیا ہے۔ ذرائع کا یہ بھی کہنا ہے کہ ملزم عرصہ دراز سے بھارتی خفیہ ایجنسی را کےلیے کام کررہا تھا اور پاکستانی حساس اداروں کی تصاویر اور معلومات بھی انکو فراہم کرتا رہا ہے۔
