لاہور( نمائندہ خصوصی)استحکام پاکستان پارٹی کے صدر عبدالعلیم خان نے کہا ہے کہ بلوچستان میں دہشتگردوں کے حملے میں پاک فوج کے 4 جوانوں کی شہادت کا واقعہ افسوسناک ہے۔
سماجی رابطے کی ویب سائٹ ٹویٹر پر اپنے بیان میں انہوں نے کہا کہ وطن کی خاطر جانوں کا نذرانہ پیش کرنے والے فوجی جوانوں کو سلام پیش کرتے ہیں۔انہوں نے کہا کہ بلوچستان کے ضلع ژوب کے کینٹ کے علاقے میں دہشت گردوں کا حملہ افسوسناک ہے۔ دہشتگردی کے خلاف آپریشن میں 4 فوجی جوان مردانہ وار مقابلہ کرتے ہوئے شہید ہو گئے۔
اللہ تعالی شہدا کے درجات بلند فرمائے اور زخمیوں کو جلد از جلد صحت یاب کرے۔ایک اور ٹویٹ میں انہوں نے لکھا تھا کہ ایک مرتبہ پھر پاکستان کا ساتھ دینے پر شاہ سلمان اور ولی عہد شہزادہ محمد بن سلمان کا شکریہ ادا کرتے ہیں، پاکستان کو 2 ارب ڈالر موصول ہونے پر قوم سعودی حکومت کی مشکور ہے۔انہوں نے کہا کہ ایک دوست کے ناطے سعودی عرب نے ہمیشہ مشکل حالات میں پاکستان کا بھرپور ساتھ دیا۔
اس پیکج کے حصول میں آرمی چیف کی کاوشیں بھی لائق تحسین ہیں۔ اب پاکستان کو بیرونی امداد کی بجائے اپنے پائوں پر کھڑا ہونے کی ضرورت ہے کیونکہ بیرونی امداد مسائل کا حل نہیں۔ ماضی کی حکومتوں کی نااہلی اور بد انتظامی کی وجہ سے آج پاکستان مشکلات سے دوچار ہوا،اب ہمیں مالیاتی ڈسپلن یقینی بنانا ہوگا۔
