لاہور (کا مرس ڈیسک)فائونڈر گروپ کے سرگرم رکن ،پاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین نے ادارہ شماریات کی اس رپورٹ پر تشویش کا اظہار کیا ہے۔
جس کے مطابق گزشتہ مالی سال کے دوران بڑی صنعتوں کی پیداوار میں9.89فیصد کمی ریکارڈ کی گئی ہے،بجلی گیس، پٹرولیم مصنوعات کی قیمتوں میں اضافہ سے صنعتی شعبہ کی پیداواری لاگت بڑھ رہی ہے جس سے اشیاء مہنگی ہونے کے باعث ملکی برآمدات کمی کاشکار ہیں انہوں نے کہا کہ اعداد و شمار کے مطابق جاری گزشتہ مالی سال کے دوران کاٹن یارن،گارمنٹس، آئرن و سٹیل سمیت8بڑی صنعتوں کی پیداوار میں کمی ہوئی ،
سیمنٹ کی پیداوار میں 12.36فیصد ،پٹرولیم مصنوعات کی پیداوار میں 12.23فیصد کمی ریکارڈ کی گئی ،کاٹن یارن کی پیداوار میں 21.36فیصد،آٹو موبائل سیکٹر کی پیداوار میں47.70فیصدگر گئی ،فرٹیلائزر کی پیداوار میں.24 9فیصد ،آئرن و سٹیل کی پیداوار میں 4.76فیصد کمی ریکارڈ کی گئی ۔انہوں نے کہا کہ بڑی صنعتوں کی پیداوار میں اضافہ سے ہی ملکی برآمدات اور روزگار کے ذرائع میں اضافہ ہوگا اور ملک خوشحالی و ترقی کی راہوں پر گامزن ہوگا۔ ان خیالات کااظہار انہوںنے فیروز پور بورڈ کے تاجروں کے وفد سے گفتگو کرتے ہوئے کیا۔
فائونڈر گروپ کے رہنما میاں محمد اشرف نے کہا کہ بڑی صنعتوں کی پیداوار میں 9.89فیصد کمی سے بے روزگاری میں اضافہ ہورہا ہے ، برآمدات کی بحالی اور توسیع کے سلسلہ فوری اقدامات کی ضرورت ہے اس ضمن میں پاکستانی مصنوعات کے لیے بیرون ملک نئی منڈیوں کی تلاش اور بیرون ملک سفارتخانوں کو فعال کیا جائے تاکہ وہ بیرون ملک پاکستانی مصنوعا ت کی کھپت اور برآمدات میں اضافہ کیلئے اپنا اہم کردار ادا کریں ۔
خادم حسین نے کہا کہ حکومت برآمدات میں اضافہ کیلئے صنعتی شعبہ کو مراعات دے تاکہ زرمبادلہ کے ذخائر بڑھ سکیں،تجارتی خسارہ میں کمی اور حکومت کی طرف سے برآمدی اہداف کے حصول کیلئے صنعتی شعبہ کی پیداواری لاگت میں کمی لائی جائے تاکہ پاکستانی اشیاء کی بیرون ملک کھپت میں اضافہ سے برآمدات میں اضافہ اور تجارتی خسارہ میں مزید کمی ہوسکے۔