باصلاحیت لوگوں کو مواقع فراہم کیے جائیں تو ہماری فلمیں بھی آسکر کیلئے نامزد ہوسکتی ہیں،ببرک شاہ

لاہور (شوبز ڈیسک)معروف اداکار ببرک شاہ نے کہا ہے کہ ہمارے پاس اتنا ٹیلنٹ موجود ہے کہ ہم ہالی ووڈ کی طرزکی فلمیں بنا سکتے ہیں ،

اگر ڈاکومینٹری فلم پر شرمین عبید چنائے آسکر ایوارڈ حاصل کر سکتی ہیں تو ہم اپنی فیچر فلموں کے ذریعے اس مقام تک پہنچ سکتے ہیں ۔ خصوصی گفتگو کرتے ہوئے انہوں نے کہا کہ ہمارے پاس باصلاحیت رائٹر ، ڈائریکٹر اور اداکار موجود ہیں جو کسی طور پر بھی ہالی ووڈ سے کم نہیں صرف ان کو مواقع دینے کی ضرورت ہے ۔

ہالی ووڈ میں اربوں روپے سے فلم بنتی ہے جبکہ ہم تین چار کروڑ روپے میں فلم بنا لیتے ہیں اگر باہمی مشترکہ فلمسازی کے رحجان کو فروغ دیا جائے تو ہم بھی بڑے بجٹ کی فلمیں بنا کر اس کو عالمی مارکیٹ میں ریلیز کر سکتے ہیں ۔ انہوں نے کہا کہ میں نے اپنی فلم ”مولا وے ” کے 24شعبوں میں کام کر کے عالمی ریکارڈ بنایا ہے اور میں سمجھتا ہوں کہ مجھ سے زیادہ صلاحیت رکھنے والے لوگ بھی انڈسٹری میں موجود ہیں بس انہیں موقع دینے کی ضرورت ہے ۔