پاکستان مسلم لیگ (ن) کے سینئر رہنما خواجہ سعد رفیق نے ایک تقریب میں کہا ہے کہ اگر پاک بھارت جنگ ہوئی تو بھارت کو پاکستان سے کہیں زیادہ نقصان اُٹھانا پڑے گا۔ انہوں نے خطے میں امن کی ضرورت پر زور دیا اور کہا کہ مسائل کا حل جنگ نہیں بلکہ مکالمہ ہے۔
انہوں نے کہا کہ بھارت کو اکھنڈ بھارت جیسے خواب ترک کر کے حقیقت پسندی اپنانی چاہیے۔ کشمیر پر اربوں روپے خرچ کرنے کے باوجود کشمیریوں کا پاکستان سے رشتہ ختم نہیں ہو سکا۔
سعد رفیق نے یہ بھی کہا کہ پاکستان ایٹمی طاقت بن چکا ہے اور ہمیں یہ قدم بھارتی اقدامات کی وجہ سے اٹھانا پڑا۔ انہوں نے کہا کہ بھارت کو جنگ جیسے حالات پیدا کرنے سے گریز کرنا چاہیے، کیونکہ ایک اور تصادم کی صورت میں سب سے بڑا نقصان خود بھارت کا ہوگا۔
انہوں نے پاکستان میں تعلیمی پالیسیوں، قومی زبان اور کلچر کو نظر انداز کرنے پر بھی تنقید کی، اور زور دیا کہ تعلیمی پالیسی میں اساتذہ اور ماہرین تعلیم کو شامل کیا جانا چاہیے۔
