دبئی سے ڈھاکہ جانے والی فلائی دبئی کی پرواز FZ501 کو جمعے کی علی الصبح ایک مسافر کی طبیعت خراب ہونے کے باعث کراچی ایئرپورٹ پر ہنگامی لینڈنگ کرنا پڑی۔
پاکستان ایئرپورٹس اتھارٹی کے ترجمان کے مطابق، طیارہ صبح 3:20 بجے جناح انٹرنیشنل ایئرپورٹ پر بحفاظت اترا اور بے نمبر 21 پر پارک کیا گیا۔
مسافرہ، جو بنگلہ دیشی شہری تھیں، کو فوری طور پر طبی امداد فراہم کی گئی اور بعد ازاں آغا خان اسپتال منتقل کیا گیا۔
میڈیکل ایمرجنسی کے بعد، صبح تقریباً 5:15 پر طیارے میں ایک تکنیکی خرابی پیدا ہوئی، جس کے باعث تمام 159 مسافروں کو ٹرانزٹ لاؤنج منتقل کر دیا گیا۔
دبئی سے متبادل عملہ اور تکنیکی ٹیم کراچی پہنچی، جنہوں نے طیارے کی مرمت مکمل کی۔
تمام کلیئرنس مکمل ہونے کے بعد پرواز دوپہر 1:21 پر ڈھاکہ روانہ ہو گئی۔
