امریکی صدر ڈونلڈ ٹرمپ کی جانب سے غیر ملکیوں کے لیے نئے سخت اقدامات نافذ کر دیے گئے ہیں، جن کے تحت امریکا میں مقیم تمام غیر ملکی شہریوں کو اپنی رجسٹریشن کروانا اور قانونی حیثیت کا ثبوت ہر وقت اپنے ساتھ رکھنا لازمی ہوگا۔
یہ ہدایات امریکی ہوم لینڈ سیکیورٹی اور یو ایس سٹیزن شپ اینڈ امیگریشن سروسز (USCIS) کے تحت نافذ کی گئی ہیں، جن کا اطلاق 18 سال یا اس سے زیادہ عمر کے تمام غیر ملکیوں پر ہوتا ہے، چاہے ان کے پاس قانونی ویزا یا گرین کارڈ ہی کیوں نہ ہو۔
یو ایس سی آئی ایس کے مطابق، رجسٹریشن کے بعد جاری کردہ ثبوت، جس میں بائیومیٹرک معلومات شامل ہوں گی، ہر وقت ساتھ رکھنا ضروری ہے۔ ہدایت کی خلاف ورزی کی صورت میں جرمانہ یا قید کی سزا ہو سکتی ہے۔
نئے قانون کے مطابق، 30 دن سے زیادہ امریکا میں قیام کرنے والے ہر غیر ملکی کو فارم G-325A کے ذریعے بائیومیٹرک رجسٹریشن کرانی ہوگی، اور اگر فنگر پرنٹس پہلے سے نہیں دیے گئے، تو وہ بھی دینا لازمی ہوگا۔
یہ ضوابط طلبہ، ورک ویزا ہولڈرز، عارضی سیاح، اور یہاں تک کہ 30 دن سے زائد قیام کرنے والے کینیڈین شہریوں پر بھی لاگو ہوں گے۔ والدین کو ہدایت کی گئی ہے کہ 14 سال سے کم عمر بچوں کی بھی رجسٹریشن مقررہ وقت میں کروائیں۔
نئے قانون کے تحت، پولیس یا کسی بھی قانون نافذ کرنے والے افسر کو یہ حق حاصل ہوگا کہ وہ کسی بھی غیر ملکی سے قانونی حیثیت کا ثبوت طلب کر سکے۔
