اسلام آباد:
پاکستان کے حالیہ دورے پر آئے امریکی اراکینِ کانگریس نے دونوں ممالک کے تعلقات کو مضبوط بنانے کے لیے اہم پیش رفت قرار دی ہے۔ ان کا کہنا تھا کہ یہ دورہ صرف خیر سگالی کا مظاہرہ نہیں بلکہ عملی شراکت داری کی بنیاد ہے۔
رکنِ کانگریس جیک وارن برگ مین نے کہا کہ پاکستان اور امریکا کی شراکت داری عالمی ترقی پر اثر ڈال سکتی ہے، خاص طور پر معدنیات اور صنعتوں کے شعبے میں۔ ان کے مطابق یہ تعاون آنے والے برسوں میں مضبوط معیشت کی بنیاد رکھے گا۔
انہوں نے مزید کہا کہ نئے صنعتی طریقے اور جدت انگیز پیداوار دونوں ملکوں کے مشترکہ مستقبل کے لیے کلیدی اہمیت رکھتے ہیں۔ "ہم ایک دوسرے کی آزادی، خودمختاری اور ترقی پر یقین رکھتے ہیں۔”
کانگریس مین تھامس رچرڈ سوازی نے پاکستانی عوام کی مہمان نوازی کو سراہتے ہوئے کہا کہ امریکا میں مقیم پاکستانی کمیونٹی ایک سفیر کا کردار ادا کر رہی ہے۔ "یہ قوم محنتی، تعلیم یافتہ اور باوقار ہے۔”
کانگریس مین جوناتھن لوتھر جیکسن نے کہا کہ انہوں نے پاکستان میں اتحاد اور نظم و ضبط کو قریب سے دیکھا۔ "یہ دورہ دونوں ممالک کے درمیان اعتماد کو مزید بڑھا سکتا ہے۔”
انہوں نے مذہبی مقامات کے دورے کو روحانی تجربہ قرار دیا اور کہا کہ پاکستان کا مستقبل روشن نظر آتا ہے۔
