لاہور: وزیراعلیٰ پنجاب مریم نواز نے واضح کیا ہے کہ اقتدار ایک الٰہی امانت ہے اور صوبے کے وسائل کا ایک ایک روپیہ عوام کی ملکیت ہے۔ ان کا کہنا تھا کہ عوامی خدمت کا سفر کسی صورت نہیں رُکے گا۔
صوبائی کابینہ کے اجلاس میں آئندہ مالی سال 2025-26 کے لیے پیش کردہ بجٹ پر اظہارِ خیال کرتے ہوئے وزیراعلیٰ نے اسے ملک کی تاریخ کا منفرد اور بےمثال بجٹ قرار دیا۔ انہوں نے کہا کہ یہ زیرو ٹیکس بجٹ ہے، لیکن اس کے باوجود پنجاب کو سب سے بڑا ترقیاتی پیکج دیا گیا ہے۔
مریم نواز کا کہنا تھا کہ مالیاتی نظم، ای-ٹینڈرنگ اور شفاف طرز حکمرانی کی بدولت ترقیاتی منصوبے اسکینڈل فری ہو چکے ہیں، جو موجودہ حکومت کی بڑی کامیابی ہے۔
انہوں نے بتایا کہ 700 سڑکوں کی تعمیر اور توسیع کا کام جاری ہے، جس سے 12 ہزار کلومیٹر کا جدید سڑکوں کا جال بچھے گا۔ تعلیم اور صحت کے شعبوں میں بجٹ میں تاریخ ساز اضافہ کیا گیا ہے۔ اسپتالوں میں فری ادویات اور اسکولوں میں تمام بنیادی سہولتیں فراہم کی جائیں گی۔
وزیراعلیٰ نے اعلان کیا کہ بجٹ میں 94 نئے ترقیاتی پروگرامز اور 100 خصوصی منصوبے شامل کیے گئے ہیں۔ ان کے مطابق گزشتہ بجٹ بھی ایک ریکارڈ تھا، اور اب وہ اپنی ہی کارکردگی کے ریکارڈ کو پیچھے چھوڑ رہے ہیں۔
انہوں نے اس امر پر زور دیا کہ ماضی میں چالیس سال میں جو نہ ہو سکا، ان کی حکومت قلیل مدت میں مکمل کرے گی، جن میں 40 ہزار سے زائد گھروں کی تعمیر شامل ہے۔ عید پر صفائی کے لیے مثالی اقدامات کیے گئے، جہاں افسران خود سڑکوں پر نکلے اور عوامی خدمت کو مشن سمجھ کر انجام دیا۔
مریم نواز نے مزید کہا کہ ٹیکسوں میں اضافہ نہیں کیا جائے گا بلکہ ٹیکس نیٹ کو وسعت دی جائے گی۔ سرکاری ملازمین کو کارکردگی کی بنیاد پر اضافی بونس دینے پر غور کیا جا رہا ہے، جبکہ کم از کم اجرت 40 ہزار روپے مقرر کر دی گئی ہے اور اجرتی نظام کو مکمل طور پر ڈیجیٹلائز کیا جائے گا۔
وزیراعلیٰ نے بتایا کہ حکومت نے آئی ایم ایف کی شرائط کے باوجود 740 ارب روپے کا سرپلس بجٹ پیش کیا ہے، اور مقامی قرضوں کی شرح میں 94 فیصد کمی واقع ہوئی ہے۔
انہوں نے کہا کہ تمام مالیاتی تفصیلات زبانی یاد ہیں اور اسمبلی میں مکمل شفافیت کے ساتھ پیش کی جائیں گی۔ انہوں نے وزیر خزانہ، چیف سیکرٹری، مریم اورنگزیب اور تمام ٹیم کو خراجِ تحسین پیش کیا۔
آخر میں ان کا کہنا تھا کہ اقتدار صرف طاقت نہیں، ذمہ داری ہے، اور نیت و محنت کے ساتھ کامیابی کا سفر جاری رکھا جائے گا۔
