لنڈی کوتل(نیوز رپورٹر)افغان مہاجرین کی وطن واپسی کا عمل ڈیڈ لائن ختم ہونے کے 3 روز بعد بھی شروع نہ ہوسکا۔ذرائع کے مطابق لنڈی کوتل ٹرانزٹ کیمپ تیسرے روز بھی فعال نہیں ہوسکا۔
پالیسی کے مطابق ملک بھر میں غیر قانونی طور پر رہائش پذیر غیرملکیوں کو پشاور میں عارضی کیمپ میں منتقل کیا جانا تھا۔ پشاور ٹرانزٹ کیمپ سے لنڈی کوتل عارضی کیمپ منتقل کیے جانے کا منصوبہ تھا۔ ذرائع کا مزید کہنا ہے کہ صوبائی حکومت نے غیرملکیوں کی بے دخلی کے لیے وفاق سے 10 اپریل تک مہلت مانگ لی ہے۔ غیرملکیوں کے انخلا کے لیے صوبائی حکومت کو فنڈز کی کمی کا سامنا ہے۔
ملک میں 8 لاکھ افغان سیٹیزن شپ کارڈ ہولڈر رہائش پذیر ہیں۔پاکستان چھوڑنے والے غیر قانونی افغان باشندوں کی کل تعداد 8لاکھ 85ہزار902 تک پہنچ چکی ہے۔ خیبر پختونخوا میں رجسٹررڈ افغان مہاجرین کی کل تعداد 7لاکھ 9 ہزار سے 278 ہے جبکہ کیمپوں میں 3 لاکھ 44 ہزار 9 سوآٹھ افغان رہائش پذیر ہیں۔ سال 2013 سے اب تک 4 لاکھ 65 ہزار افغان مہاجرین طورخم کے راستے واپس جا چکے ہیں۔بلوچستان میں 3 لاکھ 17 ہزار، پنجاب میں ایک لاکھ 96 ہزار اور سندھ میں 74 ہزار 117 افغان مہاجرین رجسٹرڈ ہیں۔ اسلام آباد میں 42 ہزار 718 اور آزاد کشمیر میں 4 ہزار 448 افغان مہاجرین قیام پذیر ہیں۔
