لاہور (سپورٹس ڈیسک) قومی ٹیم کے سابق ٹیسٹ کرکٹر اظہر علی کائونٹی کرکٹ کھیلیں گے۔ اظہر علی نے گزشتہ برس انگلینڈ کے خلاف ٹیسٹ سیریز کے تیسرے میچ کے موقع پر ٹیسٹ کرکٹ سے ریٹائرمنٹ کا اعلان کیا تھا۔
انگلینڈ کے خلاف انہوں نے اپنے کیریئر کا آخری اور 97واں ٹیسٹ میچ کھیلا اور اب اظہر علی لاہور میں مقامی کلبوں کی جانب سے میچز کھیل کر خود کو کرکٹ سے منسلک کیے ہوئے ہیں۔نجی ٹی وی سے گفتگو کرتے ہوئے اظہر علی نے بتایا کہ ابھی وہ کرکٹ کھیلتے رہیں گے، کائونٹی کرکٹ کے لیے وورسٹر شائر کے ساتھ معاہدہ ہے، اس پر فوکس ہے، کائونٹی سیزن میں اچھا کرنا چاہتا ہوں۔
کوچنگ کرنے کے حوالے سے اظہر علی نے کہا کہ ابھی تو میں نے ٹیسٹ کرکٹ سے ریٹائرمنٹ لی ہے، ابھی میں انجوائے کر رہا ہوں، آگے دیکھتے ہیں کہ کیا معاملات ہوتے ہیں۔اظہر علی بھی پاکستان سپر لیگ کے شروع ہونے کے منتظر ہیں اور کہتے ہیں کہ سب لوگوں کی طرح میں بھی پاکستان سپر لیگ کے لیے پرجوش ہوں،
اب چونکہ پاکستان میں ہی میچز ہوتے ہیں اس لیے بہت مزہ آتا ہے، کراوڈ بہت زیادہ آتا ہے اچھا لگتا ہے۔انہوں نے کہا کہ پی ایس ایل میں ہر سیزن میں ہمیں اچھے کھلاڑی دیکھنے کو ملتے ہیں، امید ہے کہ اس مرتبہ بھی ہمیں نئے پلیئرز ملیں گے۔
