اسلام آباد (کامرس ڈیسک)آئی ایم ایف وفد کی پاکستان میں موجودگی کے دوران اسٹیٹ بینک کی نئی مانیٹری پالیسی (کل)پیر کو جاری ہوگی۔گورنراسٹیٹ بینک کی سربراہی میں مانیٹری پالیسی کمیٹی کے اجلاس میں شرح سودمیں کمی یا اسے برقرار رکھنے کافیصلہ ہوگا،اجلاس میں آئندہ دوماہ کیلئے مانیٹری پالیسی کا اعلان کیا جائیگا،آئی ایم ایف وفدملکی معیشت کی کارکردگی اوردیئے گئے اہداف پرکامیابی یا ناکامی جانچنے کیلئے پاکستان میں موجود ہے۔
مہنگائی کی شرح میں حکومتی تخمینہ سے زیادہ کمی انٹرسٹ ریٹ میں کمی کا سبب بن سکتی ہے، کارپوریٹ سیکٹرکو امید ہے کہ اسٹیٹ بینک شرح سود میں مزید کمی کرےگا،مختلف بروکریج ہاﺅسز کے سروے میں 70 فیصد رائے دہندگان کو شرح سود میں نصف سے ایک فیصد کمی کی توقع ہے۔
ماہرین کا کہنا ہے کہ اسٹیٹ بینک کے پاس شرح سود میں کمی کی گنجائش تو موجود ہے لیکن اس سے ہماری ٹریڈ میں درآمدات کا دباﺅ بھی بڑھ سکتا ہے۔ اس وقت بنیادی شرح سود 12فیصد جبکہ کائبور 11سے11.5 فیصد پر ہے،زرمبادلہ ذخائر اور روپے کی قدر مستحکم ،مہنگائی اور کرنٹ اکانٹ خسارہ قابو میں جبکہ عالمی منڈی میں تیل کی قیمتیں بھی گر رہی ہیں،اسی لئے توقع کی جارہی ہے کہ جون تک پاکستان میں شرح سود سنگل ڈیجٹ میں آ جائے گی۔
