لاہور(نیوز رپورٹر) آل پاکستان انجمن تاجران کے مرکزی صدر اشرف بھٹی نے کہا ہے کہ اسٹیٹ بینک پالیسی ریٹ کو سنگل ڈیجٹ میں لے کر آئے
پاکستان میں پالیسی ریٹ آج بھی خطے کے دیگر ممالک کے مقابلے میں انتہائی زیادہ ہے ،امید ہے رواں مالی سال کے اختتام سے قبل زمینی حقائق کو پیش نظر رکھتے ہوئے پالیسی ریٹ کو اس کی اصل حد پر لایا جائے گا ۔
اپنے بیان میں اشرف بھٹی نے کہا کہ حکومت کے اپنے اعدادوشمار کے مطابق مہنگائی کی شرح فروری 2024 میں 1.5 فیصد ریکارڈ کی گئی لیکن اس کے برعکس پالیسی ریٹ کی شرح کو اس کے اصل مقام پر نہیں لایا گیا ۔
انہوں نے کہا کہ پالیسی ریٹ زیادہ ہونے کی وجہ سے مقامی سرمایہ بینکوں میں رہتا ہے جس کی وجہ سے مقامی کاروبار کے لئے مطلوبہ سرمایہ دستیاب نہیں ہوتا ۔بینکوں میں پڑا ہوا سرمایہ مختلف کاروباروںمیں لگنے سے ہی معیشت میں تحرک پیدا ہوگااور اس سے روزگار کے مواقع بھی پیدا ہوتے ہیں۔
اسٹیٹ بینک کے پاس اب بھی پالیسی ریٹ میں خاطر خواہ کمی کرنے کی گنجائش موجود ہے ۔ انہوں نے کہا کہ حکومت کی مثبت پالیسیوں کی وجہ سے معیشت کے حالات بہتری کی جانب گامزن ہیں ، ایسے حالات میں مقامی کاروباروںکے لئے سرمایہ میسر آنے سے ہماری معیشت مزید ترقی کرے گی ۔
