اسلام آباد (نمائندہ خصوصی)اسلام آباد پولیس نے سابق وفاقی وزیر شیریں مزاری کی بیٹی ایمان مزاری او سابق رکن اسمبلی علی وزیر کو گرفتار کرلیا۔
تھانہ ترنول پولیس ایمان مزاری کو ان کے گھر سے گرفتار کرکے اپنے ساتھ لے گئی۔سابق وفاقی وزیر شیریں مزاری نے دعویٰ کیا کہ خواتین پولیس اور سادہ کپڑوں میں ملبوس افراد ان کی بیٹی کو لے گئے۔
سماجی رابطے کی ویب سائٹ ایکس پر شیریں مزاری نے اپنے بیان میں کہا کہ اہلکار ہمارے سیکیورٹی کیمرے اور ایمان کا لیپ ٹاپ اور فون بھی لے گئے ہیں۔ شیری مزاری نے کہا کہ خواتین پولیس اہلکار اور سادہ کپڑوں میں ملبوس افراد گھر کا دروازہ توڑ کر اندر آئے۔
شیریں مزاری نے کہا کہ ہم نے پوچھا کس لیے آئے ہیں، وہ ایمان کو گھسیٹ کر باہر لے گئے۔شیریں مزاری نے الزام لگایا کہ انہیں وارنٹ بھی نہیں دکھائے گئے، یہ اغوا ہے، گھر میں صرف دو خواتین تھیں۔انہوںنے کہاکہ خواتین پولیس اہلکار اور سادہ لباس اہلکار پورے گھر میں گھومتے رہے۔بعدازاں سابق وفاقی وزیر شیریں مزاری اپنی بیٹی ایمان مزاری کی گرفتاری کے بعد اسلام آباد کچہری پہنچیں۔
صحافیوں سے گفتگو کرتے ہوئے شیریں مزاری نے کہا کہ ایمان کی گرفتاری کے لیے اہل کار گیٹ پھلانگ کر اندر آئے۔انہوں نے کہا کہ گارڈ کو کیبن میں بند کیا گیا، موبائل چھین لیا اور دروازہ توڑنے کی کوشش کی گئی، میرے کمرے میں چیزوں کو بھی ٹٹولا اور سرچ کیا گیا۔شیریں مزاری نے کہا کہ اہلکار ایمان کا موبائل اور لیپ ٹاپ لے کر چلے گئے، میرا ہاتھ کھینچا اور موبائل بھی لے کر چلے گئے۔
سابق وفاقی وزیر نے کہا کہ گھر میں 20 کے قریب افراد گھسے تھے، 6 خواتین پولیس اہلکار گھر میں دیکھیں۔انہوںنے کہاکہ گھر میں ایمان اور میں رہتے ہیں، نہ جانے کیوں دروازہ توڑ کر آتے ہیں، اسے بغیر وارنٹ کے گرفتار کیا گیا۔دریں اثناء اسلام آباد پولیس نے سابق رکن قومی اسمبلی علی وزیر کو گرفتار کرلیا۔اسلام آباد پولیس کے مطابق علی وزیر کو تھانہ ترنول پولیس نے کار سرکار میں مداخلت پر گرفتار کیا ہے۔
دوسری جانب اسلام آباد پولیس نے سابق رکن قومی اسمبلی علی وزیر اور ایمان مزاری کو گرفتار کرنے کی تصدیق کر دی اس حوالے سے ترجمان پولیس نے بتایاکہ دونوں ملزمان اسلام آباد پولیس کو تفتیش کے لیے مطلوب تھے۔انہوں نے کہا کہ تمام کارروائی قانون کے مطابق عمل میں لائی جائے گی۔ترجمان کے مطابق اسلام آباد پولیس کے شعبہ تعلقات عامہ کی جاری خبر کو ہی درست تسلیم کیا جائے۔
