امریکی جریدے وال اسٹریٹ جرنل کی ایک تازہ رپورٹ کے مطابق اسرائیل کو اپنے دفاعی نظام میں سنگین کمی کا سامنا ہے، خاص طور پر ایرو (Arrow) انٹرسیپٹر میزائلز کی تعداد میں شدید کمی واقع ہوئی ہے۔ یہ میزائل ایران کے دور مار بیلسٹک ہتھیاروں کو روکنے کے لیے بنیادی حیثیت رکھتے ہیں۔
رپورٹ میں ایک اعلیٰ امریکی اہلکار کے حوالے سے انکشاف کیا گیا ہے کہ واشنگٹن اس صورتحال سے کئی ماہ قبل آگاہ ہو چکا تھا، اور اسی تناظر میں امریکہ نے اسرائیل کی بری، بحری اور فضائی دفاعی صلاحیتوں کو مزید مستحکم کرنے کے اقدامات کیے ہیں۔
اسرائیلی افواج نے رپورٹ پر ردِ عمل دیتے ہوئے اسلحے اور دفاعی تیاریوں پر کسی قسم کا تبصرہ کرنے سے انکار کیا ہے۔ ماہرین خبردار کر رہے ہیں کہ اگر انٹرسیپٹرز کی کمی جاری رہی تو اسرائیل کو ایران جیسے ممکنہ دشمنوں کے میزائل حملوں سے مکمل تحفظ فراہم کرنا مشکل ہو جائے گا۔
