غزہ،واشنگٹن (انٹرنیشنل نیوز )غزہ میں اسرائیل کی بربریت جاری، تازہ حملوں میں مزید 13 فلسطینی شہید، جبالیہ میں ڈرون حملے میں حماس رہنما عبداللطیف القانو بھی شہید ہوگئے۔
عالمی میڈیا کے مطابق غزہ میں اسرائیل کی بربریت جاری، تازہ حملوں میں مزید 13 فلسطینی شہید، جبالیہ میں ڈرون حملے میں حماس رہنما عبداللطیف القانو بھی شہید ہوگئے۔ گزشتہ چوبیس گھنٹے میں 7 بچوں سمیت 43 فلسطینی شہید اور متعدد زخمی ہوگئے۔ عرب میڈیا کے مطابق اسرائیل نے ڈرون کے ذریعے پناہ گزین کیمپوں اور فوڈ سینٹر کو نشانہ بنایا گیا۔ درجنوں رہائشی عمارتیں تباہ ہوگئیں۔ ڈرون حملے میں 11 فلسطینی شہید ہوئے۔
اسرائیلی فوج نے فلسطینیوں کو غزہ شہر کے زیتون اور تل الحوا سمیت دیگر علاقوں سے جبری نقل مکانی کا بھی حکم دے دیا ہے۔رپورٹ کے مطابق اسرائیل نے 18 مارچ سے اب تک غزہ کے 430 مقامات کو نشانہ بنایا گیا جس سے شہدا کی مجموعی تعداد 50 ہزار 193 ہوگئی۔ دوسری جانب اسرائیلی جارحیت کے خلاف اور فلسطین کے حق میں آواز اٹھانے پر امریکا میں ایک اور طالب علم کو گرفتار کر لیا گیا۔امریکی ریاست میساچوسٹس کی ٹفٹس یونیورسٹی میں زیر تعلیم ترک طالبہ رومیسہ کو امریکی امیگریشن حکام نے گرفتار کر لیا۔
رومیسہ روزہ افطار کرنے جا رہی تھیں کہ نقاب پوش، سادہ کپڑوں میں افسران اسے ہتھکڑی لگا کر اپنے ساتھ لے گئے۔ رپورٹس کے مطابق رومیسہ نے فلسطینیوں کے حامی مظاہروں میں حصہ لیا تھا۔یونیورسٹی کے صدر کے مطابق امیگریشن حکام کا کہنا ہے کہ رومیسہ کا ویزا ختم کر دیا گیا ہے۔یاد رہے کہ ٹرمپ انتظامیہ نے فلسطینیوں پر ظلم کے پہاڑ توڑنے والے اسرائیل کے خلاف احتجاج کرنے والے طالب علموں کے امریکی یونیورسٹیوں میں احتجاج پر پابندی عائد کر رکھی ہے اور فلسطین کے حق میں احتجاج کرنے والوں کے خلاف کریک ڈان کا اعلان بھی کر رکھا ہے۔
