مشرق وسطیٰ میں جاری تنازع کے ساتویں دن ایران میں اسرائیلی حملوں کے نتیجے میں ہلاکتوں کی تعداد 639 تک پہنچ چکی ہے، جب کہ زخمیوں کی تعداد 1,320 سے تجاوز کر گئی ہے۔ یہ تفصیلات امریکا میں قائم انسانی حقوق کی تنظیم ہیومن رائٹس ایکٹوسٹس کی رپورٹ میں سامنے آئیں۔
رپورٹ کے مطابق جاں بحق افراد میں 263 عام شہری اور 154 سیکیورٹی فورسز کے اہلکار شامل ہیں، جبکہ باقی افراد کی شناخت کا عمل تاحال جاری ہے۔ تنظیم کا کہنا ہے کہ یہ اعداد و شمار ایران کے اندر موجود مقامی ذرائع اور ان کے اپنے نیٹ ورک کے ذریعے تصدیق کے بعد مرتب کیے گئے ہیں۔
ایرانی حکومت کی جانب سے تازہ ترین تفصیلات جاری نہیں کی گئیں، تاہم آخری بار سرکاری سطح پر 224 افراد کے جاں بحق ہونے اور 1,277 کے زخمی ہونے کی تصدیق کی گئی تھی۔
ہیومن رائٹس ایکٹوسٹس کے مطابق، کئی علاقے شدید فضائی حملوں کی زد میں ہیں جہاں مواصلاتی نظام متاثر ہے، اور وہاں سے مکمل تفصیلات حاصل کرنا انتہائی مشکل ہو رہا ہے۔ تنظیم نے خدشہ ظاہر کیا ہے کہ حقیقی اعداد و شمار سرکاری اعلانات سے کہیں زیادہ ہو سکتے ہیں۔
اسرائیل کی جانب سے کی جانے والی بمباری کی شدت اور دائرہ کار میں توسیع نے انسانی جانوں کو شدید خطرے سے دوچار کر دیا ہے، جبکہ عالمی برادری اس صورتحال پر تشویش کا اظہار کر رہی ہے۔
