اسلام آباد (این این آئی) پاکستان تحریک انصاف کے رہنما سابق و زیر شاہ محمود قریشی نے کہاہے کہ احسن اقبال کا چین/سی پیک کے حوالے سے بیان افسوسناک اور غیر ذمہ دارانہ ہے۔
اپنے بیان میں سابق وزیر شاہ محمود قریشی نے کہاکہ یہ بات کہ ہمارا آئرن برادر ہمارے اندرونی معاملات میں مداخلت کرے گا، حیران کن اور توہین آمیز ہے۔ انہوںنے کہاکہ پی ٹی آئی کے ساتھ سی پیک کو آگے لے جانے پر ہمیشہ مضبوط اتفاق رائے رہا ہے۔
انہوںنے کہاکہ عمران خان کی قیادت میں ہم نے پی ٹی آئی حکومت کے تحت سی پیک سے پاکستان کے عزم کو مزید گہرا کرتے ہوئے، درج ذیل منصوبوں کو کامیابی کے ساتھ شروع کیا۔ سابق وزیر نے کہاکہ فیصل آباد رشکئی انڈسٹریل زونز کو آپریشنل کر دیا گیا، دھابیجی انڈسٹریل زون کو حتمی شکل دی گئی، جو زیر تعمیر ہے۔ سابق وزیر نے کہاکہ آئی ٹی سائنس، ٹیکنالوجی اور زراعت ان تین نئے مشترکہ ورکنگ گروپس پر بات چیت کی اور سی پیک کے فیز 2 میں شامل کیا۔
سابق وزیر نے کہاکہ زیر تعمیر تمام پاور پلانٹس مکمل کیے، بجلی پیدا کرنے کے منصوبے مکمل کیے اور ٹرانسمیشن پراجیکٹ شامل کیے گئے۔شاہ محمود قریشی نے کہاکہ ہائی وے کے مزید کئی کلو میٹرز کی تعمیر پی ٹی آئی حکومت میں مکمل ہوئی۔ سابق وزیر خارجہ نے کہاکہ مغربی صف بندی کو حتمی شکل دی گئی، اور کام میں تیزی آئی، گوادر انڈسٹریل زون کو وسعت دے کر آپریشنل کیا گیا۔
