کراچی (شوبز ڈیسک) معروف اداکارہ و ٹی وی میزبان سعدیہ امام نے کہا ہے کہ آج کل کے ڈرامے وہ اپنی بیٹی کے ساتھ بیٹھ کر نہیں دیکھ سکتیں۔
ایک ٹی وی شو میں بات کرتے ہوئے سعدیہ امام نے کہا کہ پہلے کم تعداد میں ڈرامے بنتے تھے، لیکن ان کا معیار بہت مضبوط ہوتا تھا، جبکہ آج بے شمار چینلز اور پروڈکشن ہاسز کے باوجود کہانیوں میں وہ گہرائی اور نکھار کم نظر آتا ہے۔سعدیہ امام نے گہری تشویش کا اظہار کرتے ہوئے ڈراموں پر تبصرہ کیا،
انہوں نے کہا کہ آج کے کئی ڈرامے دیکھ کر حیرانی ہوتی ہے کہ ہمارے رائٹرز کس سوچ کے تحت یہ کہانیاں لکھ رہے ہیں؟ کون سے جذبات کے زیرِ اثر ایسے مکالمے تخلیق کیے جا رہے ہیں؟ پہلے ہمارے پاس سنسرشپ کا ایک معیار تھا، مگر اب کئی ڈرامے ایسے ہوتے ہیں جو میں اپنی بیٹی کے ساتھ بیٹھ کر نہیں دیکھ سکتی۔ مجھے لگتا ہے کہ بچوں کو ایسے مواد سے دور رکھنا ہی بہتر ہے۔
