دبئی(سپورٹس نیوز)انٹرنیشنل کرکٹ کونسل (آئی سی سی) نے تازہ ون ڈے پلیئرز کی نئی رینکنگ جاری کردی، بھارتی بیٹر ویرات کوہلی کی ترقی ہوئی ہے جبکہ بابر کی دوسری پوزیشن برقرار ہے۔
آئی سی سی کی ون ڈے رینکنگ کے مطابق بھارت کے شبمن گل کا پہلا نمبر برقرار ہے جبکہ پاکستان کے بابر اعظم دوسرے نمبر پر براجمان ہیں، چیمپئنز ٹرافی میں بہترین بلے بازی کے بعد ویرات کوہلی ایک درجہ ترقی کر کے پانچویں سے چوتھے نمبر پر آ گئے ہیں۔جنوبی افریقا کے ہینرک کلاسن ایک درجہ ترقی کے بعد تیسرے نمبر پر آگئے ہیں اور بھارتی کپتان روہت شرما 2 درجے تنزلی کے بعد پانچویں نمبر پر چلے گئے ہیں۔
افغانستان کے ابراہیم زدران 13 درجے ترقی کے بعد 10 ویں نمبر پر آ گئے ہیں، آسٹریلیا کے سٹیو سمتھ 2 درجے ترقی کے بعد 16 ویں نمبر پر براجمان ہو گئے ہیں۔ون ڈے بالرز رینکنگ میں سری لنکا کے مہیش تھیکشانا کا پہلا نمبر برقرار ہے، جنوبی افریقا کے کیشو مہاراج 2 درجے ترقی کے بعد دوسرے نمبر پر آ گئے ہیں، نیوزی لینڈ کے میٹ ہنری تین درجے ترقی کے بعد تیسرے نمبر پر پہنچ گئے ہیں جبکہ پاکستان کے شاہین آفریدی بالرز کی رینکنگ میں نویں نمبر پر موجود ہیں۔
بھارت کے محمد شامی تین درجے ترقی کے بعد 11 ویں نمبر پر آ گئے ہیں، جنوبی افریقا کے مارکو جینسن 9 درجے ترقی کے بعد 18 ویں نمبر پر موجود ہیں، انگلینڈ کے جوفرا آرچر 13 درجے ترقی کے بعد 21 ویں نمبر پر پہنچ گئے ہیں۔ون ڈے آل راﺅنڈرز رینکنگ میں افغانستان کے عظمت اللہ عمر زئی پہلے نمبر پر آگئے ہیں، عظمت اللہ عمر زئی کی رینکنگ میں 2 درجے ترقی ہوئی ہے، افغانستان کے محمد نبی ایک درجہ تنزلی کے بعد دوسرے نمبر پر چلے گئے ہیں جبکہ بھارت کے اکشر پٹیل 17 درجے ترقی کے بعد 13 ویں نمبر پر آ گئے ہیں۔
