اسلام آباد(کامرس ڈیسک)وفاقی بورڈ آف ریونیو (ایف بی آر) نے آئی ایم ایف کی ایک اور شرط پوری کرتے ہوئے پاکستان میں صنعتی شعبے کی پیداوار کی الیکٹرانک مانیٹرنگ کا فیصلہ کیا ہے۔
ترجمان ایف بی آر کے مطابق ملک بھر میں اشیا کی پیداوار کی ویڈیو نگرانی کی جائے گی تاکہ پیداوار کے عمل کی نگرانی اور ریکارڈ کی درستگی کو یقینی بنایا جاسکے۔ایف بی آر کا کہنا ہے کہ اس مقصد کے لیے ڈیجیٹل آئی سافٹ ویئر نصب کیا جائے گا جو سینٹرل کنٹرول یونٹ کے ذریعے ایف بی آر کو رئیل ٹائم ڈیٹا فراہم کرے گا۔ترجمان نے بتایا کہ اس نظام کے ذریعے پیداوار کے ریکارڈ کا تجزیہ ممکن ہوگا جس سے کسی بھی غیر قانونی سرگرمی کی صورت میں فوری قانونی کارروائی کی جا سکے گی۔
ایف بی آر نے کہا کہ مانیٹرنگ کے بغیر مال فیکٹری سے نہیں نکل سکے گا جو کہ صنعتوں میں شفافیت اور قواعد کی پابندی کو یقینی بنانے کے لیے اہم قدم ہے۔ ترجمان کا کہنا تھا کہ کاروباری احاطے میں پروڈکشن مانیٹرنگ سامان نصب کیا جائے گا جسے لائسنس یافتہ مجاز وینڈر کے ذریعے نصب کیا جائے گا۔ایف بی آر کے مطابق یہ وینڈر اس ٹیکنالوجی کو وقتا فوقتا اپ گریڈ بھی کرے گا تاکہ سسٹم کی کارکردگی میں بہتری لائی جاسکے۔ترجمان نے مزید بتایا کہ اس پروگرام کے تحت نگرانی کے سامان کی تنصیب کے لیے فیس چارج کرنے کا اختیار بھی ایف بی آر کے پاس ہوگا۔
