تل ابیب، 11 اپریل 2025:
غزہ میں جنگ بندی اور حماس کی قید میں موجود یرغمالیوں کی واپسی کا مطالبہ کرنے والے اسرائیلی فضائیہ کے ریزرو پائلٹس کو سخت نتائج کا سامنا کرنا پڑا۔ اسرائیلی فضائیہ نے ان پائلٹس کو فورس سے نکالنے کا عمل شروع کر دیا ہے۔
بین الاقوامی خبر رساں ادارے کے مطابق، ایک ہزار سے زائد ریزرو اور ریٹائرڈ فضائی افسران نے اسرائیلی وزیراعظم نیتن یاہو کی پالیسی کے خلاف ایک خط پر دستخط کیے، جس میں جنگ کے خاتمے کا مطالبہ کیا گیا تھا۔ ان کا کہنا تھا کہ جنگ اب سیکیورٹی کے لیے نہیں بلکہ سیاسی مقاصد کے تحت جاری ہے۔
فضائیہ کے کمانڈر نے ان پائلٹس کی برطرفی کا فیصلہ چیف آف جنرل اسٹاف کی مکمل حمایت سے کیا، جبکہ نیتن یاہو نے بھی اس اقدام کی توثیق کرتے ہوئے کہا کہ ایسے بیانات سے ریاستی مفادات کو نقصان پہنچتا ہے۔
اسرائیلی حکومت کا کہنا ہے کہ یہ خیالات دشمنوں کے لیے تقویت اور فوج کے حوصلے کو پست کرتے ہیں، لہٰذا ایسے افسران کے خلاف کارروائی ناگزیر ہے۔
