لاہور (نمائندہ خصوصی) پاکستان تحریک انصاف کے چیئرمین و سابق وزیر اعظم عمران خان نے اسمبلیوں کی تحلیل پر آئینی ماہرین سے مشاورت مکمل کر لی جبکہ پارٹی رہنمائوں اور ارکانِ اسمبلی سے مزید مشاورت کے بعد (ہفتہ ) لبرٹی چوک میں اسمبلیاں توڑنے اور دیگر معاملات سے متعلق اعلانات کریں گے۔
پی ٹی آئی کے ذرائع کے مطابق قانونی ماہرین نے عمران خان کو تمام قانونی و آئینی معاملات سے آگاہ کر دیا ہے، عمران خان نے قانونی ماہرین کی رائے کو نوٹ بھی کیا ہے۔عمران خان نے قانونی ماہرین سے مختلف قانونی سقم پر سوالات بھی پوچھے ہیں۔قانونی ماہرین نے عمران خان کو بتایا ہے کہ اسمبلی کی تحلیل پر سمری گورنر کے سپرد کی جائے تو گورنر اسے روک نہیں سکتے۔قانونی ماہرین نے بتایا ہے کہ آئین کے تحت گورنر کو سمری موصول ہونے کے 48گھنٹوں میں اسمبلی خود تحلیل ہو جاتی ہے۔
ذرائع نے بتایا ہے کہ عمران خان نے اسمبلیوں کی تحلیل پر 3ہفتوں سے زائد مختلف قانونی ماہرین سے مشاورت کی۔عمران خان پارٹی رہنمائوں اور ارکانِ اسمبلی سے مزید مشاورت کریں گے جبکہ وہ کل بروز ہفتہ 17 دسمبر کو لبرٹی چوک میں اسمبلیاں توڑنے اور دیگر معاملات سے متعلق اعلانات کریں گے۔
