کیا اسلام آباد میں پھر برف جیسے اولے برسیں گے؟ محکمہ موسمیات کی وارننگ جاری

اسلام آباد میں حالیہ شدید ژالہ باری کے بعد محکمہ موسمیات نے خبردار کیا ہے کہ آئندہ دنوں میں ایسی صورتحال دوبارہ پیش آ سکتی ہے۔

گزشتہ روز اچانک موسم کی تبدیلی کے باعث اسلام آباد اور اردگرد کے علاقوں میں ہونے والی ژالہ باری نے درجنوں گاڑیوں کو نقصان پہنچایا، جبکہ کئی عمارتیں بھی متاثر ہوئیں۔ فیصل مسجد کو بھی جزوی نقصان کی اطلاعات ہیں۔

محکمہ موسمیات کے مطابق موسم کی غیر متوقع شدت اور موسمیاتی تبدیلیاں اس طرح کے مظاہر کا سبب بن رہی ہیں۔ گرمی کی لہر کے درمیان ایسے اچانک موسم کی تبدیلی کے امکانات مزید بڑھ گئے ہیں۔

ماہرین کہتے ہیں کہ موسمیاتی تبدیلیوں کے اثرات اب واضح طور پر محسوس ہو رہے ہیں، اور آئندہ بھی اسی نوعیت کے واقعات پیش آ سکتے ہیں۔

مزید یہ کہ محکمہ موسمیات نے آئندہ دنوں میں ہیٹ ویو کی وارننگ بھی جاری کی ہے۔