چین نے ایک ایسا جدید ٹیکنالوجی پر مبنی بم متعارف کروا دیا ہے جو دشمن کے بجلی گھروں اور پاور گرڈز کو تباہ کیے بغیر غیر فعال کرنے کی صلاحیت رکھتا ہے۔ یہ ہتھیار "بلیک آؤٹ بم” یا "گرافائٹ بم” کے نام سے جانا جا رہا ہے۔
چینی سرکاری چینل سی سی ٹی وی کی جانب سے جاری کی گئی ایک اینیمیٹڈ ویڈیو میں اس نئے ہتھیار کی کارکردگی دکھائی گئی۔ ویڈیو میں بتایا گیا کہ یہ بم زمین سے داغے جانے والے ایک میزائل کے ذریعے ہدف پر پہنچتا ہے، اور فضا میں 90 کے قریب چھوٹے سب میونیشنز خارج کرتا ہے۔
یہ سب میونیشنز زمین سے ٹکرا کر ہوا میں چھوٹے باریک کاربن فائبرز خارج کرتے ہیں، جو پاور لائنز میں شارٹ سرکٹ پیدا کر کے بجلی کے نظام کو مکمل طور پر بند کر سکتے ہیں۔ یہ فائبرز انسانی آنکھ سے بمشکل نظر آتے ہیں مگر بجلی کے نظام کے لیے انتہائی خطرناک ثابت ہو سکتے ہیں۔
سی سی ٹی وی کے مطابق یہ ہتھیار دشمن کے کمانڈ اینڈ کنٹرول سسٹمز کو مفلوج کرنے کے لیے ایک خاموش مگر مؤثر حربہ ہے، جو تقریباً 10,000 مربع میٹر کے علاقے کو متاثر کرنے کی صلاحیت رکھتا ہے۔
دلچسپ امر یہ ہے کہ ویڈیو میں ہتھیار کے اصل تکنیکی نام یا تفصیلات نہیں بتائی گئیں، اور اسے صرف "مقامی طور پر تیار کردہ میزائل” قرار دیا گیا ہے، جس سے ظاہر ہوتا ہے کہ چین اس ٹیکنالوجی کو ابھی خفیہ رکھنا چاہتا ہے۔
