مکوآنہ (نمائندہ خصوصی)پاکستان تحریک انصاف کے مرکزی رہنماء فرخ حبیب نے کہا ہے کہ چادر چاردیواری کی پامالی اس نالائق نگران حکومت کا وطیرہ بن چکی ہے، میری غیرموجودگی میں میری فیملی اور سسرال میں موجود خواتین کو ہراساں کیا گیا۔
فرخ حبیب نے کہاکہ چادر اور چار دیواری کی پامالی اس نالائق نگران حکومت کا وطیرہ بن چکی ہے،میری غیر موجودگی میں یہ میری فیملی اور سسرال میں موجود خواتین کو ہراساں کرتے رہے۔فرخ حبیب نے کہا کہ اس طرح کے اوچھے ہتھکنڈوں سے ہم گھبرانے والے نہیں ہماری حقیقی آزادی کی جنگ عمران خان کے سنگ پوری قوت سے جاری رہے گی۔
دوسری جانب مقامی عدالت تحریک انصاف کے چیئرمین عمران خان کے فوکل پرسن برائے ڈیجیٹل میڈیا اظہر قاضی مشوانی کے اغواء کا مقدمہ درج کرنے اور ان کی بازیابی کیلئے دائر درخواست پر متعلقہ پولیس سے 28 مارچ تک جواب طلب کر لیا۔ اظہر مشوانی کے بھائی کی درخواست پر سماعت ہوئی۔درخواست میں موقف اپنایا گیا کہ اظہر مشوانی کو زمان پارک جاتے ہوئے نا معلوم افراد نے اغواء کیا،پولیس کو ایف آئی آر کے درخواست دی لیکن مقدمہ درج نہیں کیا گیا۔
عدالت مقدمہ درج کرنے اور اظہر مشوانی کو بازیاب کرانے کا حکم دے۔ عدالت نے اظہر مشوانی کے بھائی کی درخواست پر پولیس کو نوٹس جاری کردیا۔اس معاملے پر مغوی اظہر مشوانی کی والدہ کی جانب سے عدالت میں درخواست دائر کی گئی، جس میں لاہور ہائیکورٹ راولپنڈی بینچ نے اظہر مشوانی کی گمشدگی کیس میں فریقین کو نوٹس جاری کرتے ہوئے آئندہ سماعت پر مغوی کو پیش کرنے کا حکم دیا ہے۔
