کراچی (نیوز ڈیسک)پاکستان تحریک انصاف سندھ کے صدر حلیم عادل شیخ نے ملک میں بڑھتی ہوئی مہنگائی پر گہری تشویش کا اظہار کرتے ہوئے کہا ہے کہ پیٹرولیم مصنوعات تاریخ کی بلند ترین سطح پر پہنچ چکی ہیں اور مہنگائی کا طوفان بے قابو ہو چکا ہے۔ انہوں نے کہا کہ بجلی، گیس، آٹا، چینی اور دیگر اشیائے ضروریہ کی قیمتوں میں مسلسل اضافے نے عوام کو شدید مشکلات سے دوچار کر دیا ہے۔
انہوں نے کہا کہ مہنگائی نے ہر گھر کا بجٹ تباہ کر دیا ہے اور عوام دو وقت کی روٹی کو ترس رہے ہیں، جبکہ نصف سے زائد آبادی غربت کی لکیر سے نیچے جا چکی ہے جو حکمرانوں کی نااہلی کا واضح ثبوت ہے۔ حلیم عادل شیخ نے کہا کہ مہنگائی کے بوجھ تلے دبے عوام خودکشیاں کرنے پر مجبور ہو چکے ہیں مگر حکومت خاموش تماشائی بنی ہوئی ہے۔انہوں نے کہا کہ بجلی اور گیس کے بھاری بلوں نے عوام کی کمر توڑ دی ہے جبکہ حکمرانوں کو عوام کے مسائل کی کوئی پرواہ نہیں۔ موجودہ حکمرانوں نے عوام کو بے یار و مددگار چھوڑ دیا ہے اور ریاستی نظام مکمل طور پر ناکام ہو چکا ہے۔حلیم عادل شیخ نے کہا کہ عمران خان کو تین سال سے ناحق قید میں رکھا گیا ہے، جو انصاف کا قتل عام ہے۔ انہوں نے کہا کہ اب تک عمران خان کے خلاف کوئی کیس ثابت نہیں ہو سکا، اس کے باوجود انہیں قید میں رکھنا سراسر ظلم اور ناانصافی ہے۔ ان کا کہنا تھا کہ سیاسی انتقام کے تحت عمران خان کو نشانہ بنایا جا رہا ہے اور جمہوریت کا گلا گھونٹا جا رہا ہے۔
انہوں نے مزید کہا کہ ملک میں ظلم و جبر کی انتہا ہو چکی ہے اور ہر طرف ناانصافی کا راج ہے۔ مہنگائی، بیروزگاری اور بدحالی نے عوام کی زندگی اجیرن بنا دی ہے جبکہ اشیائے خورد و نوش کی قیمتیں آسمان سے باتیں کر رہی ہیں اور عوام کی قوت خرید ختم ہو چکی ہے۔حلیم عادل شیخ نے کہا کہ حکمرانوں کی ناقص پالیسیوں نے معیشت کو تباہی کے دہانے پر پہنچا دیا ہے اور ہر روز نئی قیمتوں میں اضافہ عوام کیلئے زندہ رہنا مشکل بنا رہا ہے۔ انہوں نے کہا کہ یہ ظلم و جبر کا نظام زیادہ دیر نہیں چل سکتا کیونکہ عوام بیدار ہو چکی ہے۔انہوں نے کہا کہ تاریخ کی یہ اندھیری رات جلد ختم ہونے والی ہے اور عوام تبدیلی کیلئے تیار ہے۔ عوام عمران خان کے ساتھ کھڑی ہے اور حقیقی آزادی کی جدوجہد جاری رہے گی۔ انہوں نے کہا کہ پی ٹی آئی ہی واحد جماعت ہے جو عوام کے حقوق کی آواز بلند کر رہی ہے۔آخر میں انہوں نے مطالبہ کیا کہ ملک کو موجودہ بحرانوں سے نکالنے کیلئے فوری عمران خان کا رہا کیا جائے اور شفاف انتخابات کرایے جائیں ، بصورت دیگر مزید جعلی حکمرانی ملک کو شدید بحرانوں کی طرف دھکیل دے گی۔
٭٭٭٭٭
