لاہور(نمائندہ خصوصی) وزیراعلیٰ پنجاب سردار عثمان بزدار کے پنجاب میں لاک ڈائون میں نرمی سےمتعلقہ جاری بیان میں کہا گیا ہے کہ لاک ڈاؤن کو مرحلہ وار نرم کرنے کافیصلہ اجتماعی مشاورت سے کیاگیاہے، عام آدمی کی زندگیوں میں آسانیاں پیدا کرنے کے لئے متفقہ فیصلہ کیا گیاہے۔
سردار عثمان بزادر نے کہا کہ پنجاب حکومت نے وفاق اوردیگر صوبوں کے ساتھ اتفاق رائے سے فیصلے کئے ہیں۔ کنسٹرکشن سے منسلک صنعتوں اور متعلقہ دکانوں کو کام کرنے کی اجازت دینے کا فیصلہ کیا گیاہے ہفتے سے مزید صنعتوں اور متعلقہ کاروبار کھولنے کی اجازت ہوگی- پائپ ملز، سرامکس، سینٹری ویئر ز، پینٹس، الیکٹریکل کیبلز، سوئچ بورڈز، سٹیل، ایلومینم کی صنعتوں اور دکانوں کو کام کرنے کی اجازت ہوگی-
وزیراعلیٰ پنجاب نے کہا کہ ہارڈ ویئر سٹورکو بھی اوپن کیا جارہاہے- صوبے میں چھوٹی مارکیٹیں اور چھوٹی دکانیں کھولنے کا فیصلہ کیاگیاہے- چھوٹی مارکیٹیں اور چھوٹی دکانیں صبح فجر سے شام 5بجے تک کھلی رہیں گی- اوپن ہونے والی چھوٹی مارکیٹیں او رچھوٹی دکانیں ہفتے میں 2دن بند رہیں گی- دودن بندش کا اطلاق پہلے سے کھولی گئی فارمیسی، میڈیکل سٹورز،دودھ دہی کی دکانوں،کریانہ سٹوروں، تندوروں او ربیکریوں پر نہیں ہوگا-
سردار عثمان بزدار نے کہا کہ ہسپتالوں کی او پی ڈیز کو بھی کھولنے کا فیصلہ کیا گیاہے- انہوں نے بتایا کہ اتفاق رائے سے فیصلہ کیا گیاہے کہ تعلیمی ادارے 15جولائی تک بند رہیں گے –
وزیراعلیٰ پنجاب سردار عثمان بزدار نے کہا کہ بورڈ کے امتحانات کوبھی ختم کر دیا گیاہے- نویں،دسویں، گیاریویں اوربارویں جماعت میں پروموشن گزشتہ برس کے رزلٹ پر ہوگی- لاک ڈاؤن میں نرمی کے فیصلے کے تناظر میں شہریو ں کو حکومتی اقدامات کا بھرپور ساتھ دینا ہوگا-صوبے کے عوام کی زندگیوں کو محفوظ بھی بنانا ہے اور عام آدمی کے مسائل بھی حل کرنے ہیں۔
وزیراعلیٰ پنجاب سردار عثمان بزدار نے کہا کہ عوام کی ذمہ داری ہے کہ وہ ایس او پیز پر عملدرآمد کریں – شہری جتنی ذمہ داری کا مظاہرہ کریں گے اتنا ہی کورونا سے محفوظ رہیں گے- نو مئی بروز ہفتے سے جزوی لاک ڈائون پ عملدرآمد کیا جائے گا۔