پنجاب حکومت کا تاریخی اقدام: 65 ہزار مساجد کے ائمہ کے لیے ماہانہ وظیفہ مقرر، مساجد کی تعمیر و مرمت بھی سالانہ ترقیاتی پروگرام میں شامل

وزیراعلیٰ پنجاب مریم نواز شریف نے صوبے بھر کی 65 ہزار مساجد کے ائمہ کے لیے باقاعدہ ماہانہ وظیفہ مقرر کرنے کا فیصلہ کر لیا ہے۔ ملکی تاریخ میں یہ اپنی نوعیت کا پہلا اقدام ہے جس کا مقصد ائمہ کرام کی معاشی معاونت اور مذہبی خدمات کو ریاستی سطح پر تسلیم کرنا ہے۔

وزیراعلیٰ مریم نواز نے کہا کہ امام مسجد معاشرے کا باوقار اور محترم فرد ہے، اور محلے کی سطح پر چندہ اکٹھا کر کے ان کی تنخواہ دینا غیر مناسب عمل ہے۔ حکومت پنجاب آئمہ کرام کی ضروریات پوری کرنے کے لیے عملی اقدامات کرے گی تاکہ وہ مالی دباؤ سے آزاد ہو کر دینی فریضہ انجام دے سکیں۔

اجلاس میں مساجد کی تعمیر و مرمت کے منصوبوں کو سالانہ ترقیاتی پروگرام میں شامل کرنے کی منظوری دی گئی، اور وزیراعلیٰ نے ان منصوبوں کی فوری تکمیل کے لیے متعلقہ اداروں کو ہدایات جاری کیں۔

رائے ونڈ تبلیغی اجتماع کے لیے سڑکوں کی مرمت مکمل کر لی گئی ہے، گڑھے پر کیے گئے ہیں اور خصوصی بس سروس بھی فراہم کی جائے گی۔ اجتماع کے دوران فول پروف سیکورٹی انتظامات یقینی بنانے کے لیے ڈپٹی کمشنرز اور اسسٹنٹ کمشنرز کو براہِ راست ائمہ سے ملاقات کی ہدایت دی گئی۔

اسی اجلاس میں پنجاب میں سائبر کرائم سیل کے قیام کا اصولی فیصلہ بھی کیا گیا جبکہ لاؤڈ اسپیکر کے غیر قانونی استعمال کے خلاف مؤثر کارروائی کی ہدایت دی گئی۔

مذہبی و سماجی حلقوں نے حکومت پنجاب کے ان اقدامات کو خوش آئند اور دیرپا سماجی ہم آہنگی کی جانب اہم قدم قرار دیا ہے۔