اسلام آباد (ویب ڈیسک) پاکستان میں انسداد پولیو کی قومی مہم یکم ستمبر سے شروع ہو رہی ہے، جس کے دوران 99 اضلاع میں دو کروڑ 80 لاکھ بچوں کو پولیو کے قطرے پلائے جائیں گے۔
پولیو پروگرام کے مطابق مہم میں دو لاکھ 40 ہزار سے زائد پولیو ورکرز حصہ لیں گے جبکہ گلگت بلتستان، آزاد کشمیر اور وفاقی دارالحکومت اسلام آباد میں بھی گھر گھر جا کر بچوں کو ویکسین پلائی جائے گی۔
حکام کا کہنا ہے کہ حالیہ سیلاب سے متاثرہ اضلاع میں پولیو اور دیگر وبائی امراض کے پھیلنے کا خطرہ بڑھ گیا ہے، لہٰذا والدین ہر مہم میں بچوں کو پولیو کے قطرے ضرور پلائیں۔ ماہرین صحت کے مطابق بچوں کا حفاظتی ٹیکوں کا کورس بھی وقت پر مکمل کیا جانا ضروری ہے۔
پولیو پروگرام نے اعلان کیا ہے کہ مہم کے دوران میڈیا کے لیے بی رول فوٹیجز اور تصاویر فراہم کی جائیں گی جبکہ میڈیا ٹیموں کو فیلڈ میں جانے کی اجازت بھی دی جائے گی تاکہ آگاہی مہم مزید مؤثر بنائی جا سکے۔
